Материалдар

Көкпекті ауданында егін ору науқаны басталды. Алғаш болып іргелі шаруалар күзгі жиын-терімге кірісті. Таяу күндері өзге де диқандар дәнді-дақылдарға орақ салады. Мамандар биылғы егістің шығымы жақсы дейді. Егін ору науқанын Марат Каликовтың «Қалиқанұлы» шаруа қожалығы егістік алқабынан өз көзімізбен көріп, мамандардың дерегіне қанық болдық. 

Биыл Көкпекті ауданында егілген дәнді дақылдардың егіс алқабы 82.5 мың гектарды құрайды. Аудандық ауыл шаруашылығы бөлімі басшысының міндетін атқарушы Расул Сармановтың айтуынша, егіннің шығымы тәуір. Күзгі жиын-терім де уақытында басталған. Бүгінгі күнге дәнді дақылдардың 12,6 пайызы орылыпты. 11 мың тоннадан астам астық қамбаға құйылған.

– Биылғы жиын-терім науқанындағы өнімділік деңгейі жақсы. Аудан бойынша орташа алғанда гектарына 11 центнерден айналуда. Қазір егістік алқабын көріп отырған «Қалиқанұлы» шаруа қожалығының жиын-терімі гектарына орташа есеппен 13 центнерден. Бұл бірінші кезекте қолайлы ауа-райының әсерінен. Жалпы «Қалиқанұлы» қожалығының дәнді дақылдар алқабы 400 гектар. Аудандағы барлық шаруалар күзгі науқанға толық дайын. Қажетті техникалардың 100 пайызы әзірлікпен жұмысқа кірісті. Биылғы жылы диқандар жаңадан 4 комбаин сатып алды. Бұл дегеніміз науқан қызған шақта жұмыс өнімділігін арттыруға тамаша мүмкіндік, - дейді Расул Мұратұлы.
Егіннің шығымы жақсы болады деген мамандар, биыл әр гектарынан алынатын түсімнің де жоғары болатынына сенімді. Әрі жиын-терімнің үздіксіз жүргізілуі үшін мемлекеттің қолдауымен арзандатылған жанар-жағар май да бөлінген. Өз кезегінде біз биылғы егін орағы науқанының барысымен апта сайын оқырмандарды таныстырып, барынша жаңа жаңалықтарды жеткізіп тұратын боламыз.

Дархан БЕРДІБЕК

Пікір: