Материалдар

Шығыстың тарихқа толы Тарбағатай ауданы Ақсуат ауылында «Тұғыры биік Тарбағатай» атты халықаралық спорт және өнер фестивалі өтті. Фестивальдің ашылу салтанаты Ырғызбай Досқанаұлы кешенінде облыс әкімі Даниал Ахметовтың қатысуымен өтті. Тарбағатай төсінде балуандар белдесіп, шаршы алаңда былғары қолғап шеберлерінің жекпе-жекке шықты, азулы ақындар жырлап, жүйріктер жүйткіді, танымал «МузАРТ» тобы гала-канцерт ұсынды.

Сонымен қатар, еліміздің тарихында бұрын соңды болмаған 140 шақырымдық аламан бәйге өтті. Қалба мен Тарбағатайдың арасын жалғаған жарысқа жүзден аса жылқы қосылып, тек 11 тұлпар ғана мәре сызығын кесіп өтті. Халықаралық деңгейде өткен шарадан Көкпекті халқы да тыс қалған жоқ. «Ұлы дала қазанаты» атанған 140 шақырымдық бәйгенің 9 жүлдесін Көкпекті ауданы тікті. Бір қызығы бас жүлдеге тігілген «Нива» автокөлігіне ие болған тарбағатайлық «Қызкүрең» атты қас жүйріктің үстінде 8 сағат талмай шапқан тақымы тастай шабандоз көкпектілік Руслан Шайырғазин. Аты алашқа мәлім атақты атбегі құлынжондық Жанабыл Шайырғазиннің ұлына Қалбадан Тарбағатайға талмай шапқан Қызкүрең сәйгүліктің иесі арнайы қолқа салып, көптің тақымы шыдай бермейтін қашықтықта тізгін ұстауды сұраған екен. Екпін ауылындағы атшабарға жиылған жылқысүйер қауым мәреге жақындаған жануардың арынына тамсанды. Үлкендер «Аруақ» деп медеу қылса, жастар бөрігін аспанға атып, алақайлады.

Ежелден етене жақын көршілес аудандағы ұлы дүбірге Көкпекті ауданының қосқан үлесі осымен шектелген жоқ. Аудандық мәдениет үйі арнайы киіз үй тігіп, Ақсуатқа келген тойшы қауымды қонақ қылды. Аудан әкімі Асхат Смаиловтың атынан айтыс жанашыры, М.Мақатаев атындағы сыйлықтың екі мәрте иегері, Қазақстан Республикасының Еңбек сіңірген қайраткері Жүрсін Ерман Молдашұлы мен Халық ақыны Абаш Кәкеновке шапан жауып құрмет көрсетілді.
Әулие Ырғызбай Досқанаұлы атындағы қазақ күресінен әлемдік гран-при жжарысында қазақтың бас палуаны Айбек Нұғымаров топ жарды. 70 келіге дейінгі салмақ дәрежесінде көкпектілік жас өрен Өскен Төлеубек жеңіс тұғырынан көрінді. Ақтық сынға дейін 4 белдесуін шебер ұтқан Өскенге грузин палуанына қарсы соңғы күресте сәттілік жетіспей қалды. Сонда да, жігері мұқалмаған палуан келесі жарыстарға әлден дайындықты бастап кеттім дейді. 15 елдің кіл мықтысы жиылған сұрапыл топта ауданның атын шығарып, абаройымызды асқақ еткен Өскен ұлына деген жерлестерінің алғысы шексіз.
Үш тәулік бойы қызығы тарқамаған Тарбағатай төріндегі өнер мен спорт фестивалінен арнайы репортаж аудандық газеттің алдағы санында жарық көреді.

Пікір: