Материалдар

Ағымдағы жылдың 6 қараша  күні Шығыс Қазақстан облысы әкімінің орынбасары, облыстық ақпараттық топ мүшесі Алмасхан Бауыржанұлы Сматлаевтың Көкпекті ауданы активімен кездесуі болып өтті. Кездесу Елбасы Нұрсұлтан Назарбаевтың өткенімізді бағамдап, болашағымызды нақтылайтын 2018 жылдың 5 қазанында жарық көрген «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауының негізгі бағыттары мен одан туындайтын міндеттерді орындау барысы төңірегінде өрбіді. 

Жиынға дербес бөлімдер басшылары, ауылдық округ әкімдері, мекеме басшылары, баспасөз қызметкерлері қатысты. Жиында төрағалық еткен аудан әкімі Асхат Смаилов Елбасының халыққа арналған Жолдауы туралы түсінік берді. Ал, облыс әкімінің орынбасары Алмасхан Бауыржанұлы Елбасы Жолдауында аталған негізгі бағыттарға тоқталып, әр қайсысының маңыздылығын және облыс көлемінде қолға алынып жатқан жобалар мен 2018 жылдың қорытындысы бойынша жеткен жетістіктерді айтып өтті.
- Елбасының Жолдауы тарихи тағдырлы шешімдер тоғысқан сыртқы сын қатерден сүрінбей өтіп егеменді елді одан әрі дамыту жолы айқындалған стратегиялық бағдар. Бұл құжат Елбасымыздың тәуелсіздік алған жылдар ішінде жүргізіліп келе жатқан сындарлы саясаттың заңды жалғасы. Ол біртұтас халқымыздың, әр шаңырақ, әр азаматтың әл-ауқатын арттырып, тұрмыс сапасын жақсартуға негізделген. Әлеуметтік сала тұтастай қамтылған 6 бағыт ел ойында жүрген сұрақтарға толық жауап береді. Мұның бәрі Жолдаудың шын мәнінде халыққа жолданған, халық туралы және халыққа арналған бағдарлама екенін қуаттайды. Біздің мақсат Елбасымыздың ұсынған стратегиялық міндеттерді лайықты орындап ынтымағы жарасқан көп ұлтты халқымыздың бүгіні мен болашағына баяндап өту, - дей келе жолдаудан туындаған мәселелер бойынша жұмыстанып жатқанын айтты.
Жиын соңында өңір басшысының орынбасары саяси құжатта айтылған міндеттемелердің Қазақстан халқы үшін маңыздылығын атап өтіп, Елбасының айқындап берген тапсырмаларын бірлесе жүзеге асыруға шақырды. Аудан әкімі Асхат Сайдахметұлы Смаилов облыс әкімінің орынбасары А.Сматлаевқа алғысын білдірді.

Клара ҚАЙЫПЖАНҚЫЗЫ

Пікір: