Материалдар

Бұл күндері Индонезияның астанасы Джакартада жазғы Азия ойындары өтіп жатыр. Апта басында Джакартадан жағымды жаңалық жетті. Көкпекті ауданының тумасы Данияр Қайсанов еркін күрестен Азия ойындарының күміс жүлдегері атанды. Еркін күрестен сынға түскен жерлесіміз 74 келіде өнер көрсетіп, финалдық белдесуде Өзбекстандық палуанға есе жіберіп, күміс жүлдені місе тұтты.

2018 жылы еркін күрестен Қазақстан чемпионы болған жерлесіміз үшін Азия ойындары сәтті басталған еді. Алғашқы белдесуінде ол катарлық қарсыласын 10:0 көрсеткішімен айқын басымдықпен жеңді. Дəл осындай есеппен ширек финалда вьетнамдық спортшыны да қапы қалдырып кетті. Ал жартылай финал бəсекесінде Оңтүстік Кореяның өкілін 12:8 ұпайымен ұтты. Ақтық сында Данияр өзбекстандық Бекзод Абдурахмановқа 2:3 есебімен есе жіберді. Жас палуанның жеңісті күндері әлі алда деп сенеміз.

- Еркін күрестен Азия чемпионатының қола жүлдегері, Қазақстан чемпионы Данияр Қайсанов бауырымыздың болашағына үлкен үміт артып отырмыз. Даниярдың салмағында Қазақстан чемпионатында бәсекелестік өте жоғары. Олимпиада ойындарының жүлдегері Ақжүрек Таңатаровтың да осы салмақта күресетінін ескерген жөн. Джакартада жалауын көтерген Азия ойындарының алтыны ақтық сында қолдан сусып кеткені өкінішті. Десек те, әлі талай тер төгуге тура келеді. Қателіктерді түзетіп, алдағы байрақты бәсекелерге дайындықты нықтау керек. Басты мақсатымыз – Олимпиада ойындарына жолдама алу. Осы орайда, көкпектілік жомарт азамат Болат Бекбердиновке Даниярдың отбасы, жанашыр ағалары атынан алғыс айтқым келеді. Қолы ашық қамқор азамат Даниярға арнайы степендия тағайындап, қаржылай қолдау көрсетіп келеді. Кіндік қаны тамған Көкпекті халқының қолдауы жас палуанға қосымша күш-қайрат беретіні күмәнсіз – дейді еркін күрестен Қазақстанның еңбек сіңірген жаттықтырушысы Алтай Танабаев ағамыз.
Бүгінгі күні Қазақстан спортшылары 2 алтын, 6 күміс, 18 қола медальмен Азиаданың жалпы есебінде 12-ші орында тұр.

Дархан БЕРДІБЕК

Пікір: