Материалдар

Шығыс Қазақстан облысының Көкпекті ауданына қарасты Самар ауылындағы жағдай тұрақты. Осыған дейін Zakon.kz республикалық ақпарат порталы таратқан ақпарат бойынша қауіпсіз жерге көшірілу тиісті болған 200-ден аса тұрғын өз үйлерінде. Лайлы су қоймасынан келетін қауіптің алдын алу бойынша шұғыл жұмыстар жүріп жатыр. Бұл туралы аудандық төтенше жаңдайлар және жұмылдыру дайындығы бөлімінің басшысы Қуаныш Әңкебаев хабарлады. 

Оқиға орнына облыс әкімінің орынбасары Серік Ақтанов шұғыл жетіп, жағдаймен танысты. Облыс әкімінің орынбасары тиісті қызмет басшыларымен штаб отырысын өткізіп, арнайы тапсырмалар берді. Облыстық және аудандық төтенше жағдайлардың алдын алу қызметтерінің біріккен күшімен жағаны бекіту, су қоймасын мықтау жұмыстары қауырт жүргізілуде. Бұл жұмыстарға Самар ауылының шаруа қожалықтары мен жол ұйымдарының техникасы тартылған. 
- Лайлы су қоймасындағы су деңгейінің күрт көтерілуіне байланысты алдын алу шаралары қабылданды. Өзен жағасында орналасқан 90 үйдің тұрғындары толық дайындық жағдайына көшіріліп, құтқарушылар тәулік бойы күзетшілік етеді. «Шығыс су қоймалары» қызметкерлерінің салғырттығынан Лайлы су қоймасынан Ешкібай су қоймасына өткізу каналы тазаланбаған, қыс бойы мұз қатып жатқан. Пантелеймоновка ауылының маңындағы Карповка тоғанынан асып кеткен су Лайлыға құйылды. Таудан келген қарғын су мен жауын-шашынның салдарынан Лайлыда су көтеріліп, осындай жағдай туындап отыр, - дейді Қуаныш Мәркеленұлы. 
Оқиға орнында барлық жұмыстарға аудан әкімінің міндетін атқарушы Марат Теміржанов басшылық етуде. Қазіргі уақытта жұмыстар жалғасуда. 

Дархан БЕРДІБЕК

Пікір: