Материалдар

Сләмбек Насырбайұлы Мұқашев,
Көкпекті аудандық ардагерлер
кеңесінің төрағасы:

- Елбасы Н.Назарбаев еліміздің басты арналары арқылы кезекті Жолдауына қатысты мәлімдемелер жасап, алдағы уақытта жүзеге асырылуға тиіс он міндетке қысқаша тоқталып өтті.
Елбасының биылғы «Төртінші өнеркәсіптік революция жағдайындағы дамудың жаңа мүмкіндіктері» Жолдауы өткен жылғы Жолдауының заңды жалғасы болып табылады. Бұл Жолдауда қоғам өмірінің барлық жақтары қамтылған. Ол қазіргі жағдайдағы Қазақстан дамуының бағдарламасы болып табылады. Бұл – өнеркәсіпті дамыту, ауыл шаруашылығына жаңа технологиялар енгізу, ел экономикасын цифрландыру, білім беру, денсаулық сақтау салаларын одан әрі жетілдіру. Қазақстан халқының өмір сүру деңгейін жоғарылата отырып, дамыған 30 елдің қатарына ену сынды міндеттер қойылған нақты жоспар. Сондай-ақ, еңбекақы, жәрдемақы, зейнетақы төлеудің жаңа түрлері белгіленген. Сондықтан да, Жолдауды іске асыруға үлес қосу – бәріміздің борышымыз!

Әділ Бақытбекұлы,
Көкпекті аудандық сотының төрағасы:

- Президентіміз өзінің Жолдауында айтып өткендей, қазіргі уақытта бүкіл әлем төртінші өнеркәсіптік революция дәуіріне, технологиялық, экономикалық және әлеуметтік салалардағы терең және қарқынды өзгерістер кезеңіне қадам басып келеді. Былтыр, Қазақстанның Үшінші жаңғыруы бастау алды. Индустияландыру бағдарламасы да табысты іске асуда.
Бұл Жолдау жаңа әлемге, яғни Төртінші өнеркәсіптік революция әлеміне бейімделу мен жетістікке жету жолын табуға жол ашып беріп отыр. Елдің дамуы жолындағы орындалуы керек он міндеттің орны бөлек. Елбасы бұл міндеттерді ойдағыдай жүзеге асыру үшін билік өкілдері кеңінен түсіндіруі қажет деді.
Сондай-ақ, Президент өз сөзінде «Қазақстанның жарқын болашағы жолында барлық мақсаттарға қол жеткізетінімізге кәміл сенемін!» дей отырып, ол үшін бүкіл қоғамның бірлігі мен ынтымағы қажет екенін баса айтты.

Пікір: