Материалдар

Облыс орталығы Өскемен қаласында аудандардың ауыл шаруашылық өнімдерінің жәрмеңкесі жалғасуда. 10 маусым күні қалалықтарға Көкпекті және Зайсан аудандары бірлесіп мол өнім ұсынды. «Fresh market» сауда кешенінің аумағында орын тепкен жәрмеңке қалыптасқан дәстүр бойынша өте жоғары деңгейде өткізілді.

Облыс орталығына күні бұрын жетіп алған қос ауданның азық-түлік тауарын өндірушілері ертемен-ақ жәрмеңкені қыздырды. Атап айтар болсақ, бір ғана біздің ауданның өкілдері барлығы 7 тоннадан астам ет өнімін ұсынды. Бұл күні көкпектіліктер 5150 кг. ірі қара еті, 1430 кг. жылқы еті, 340 кг. шошқа еті және 790 кг. қой етін пұлдады. Жәрмеңкедегі өнімдер базар бағасынан 10-15 пайызға арзан.
Ауыл шаруашылық басқармасының басшысы Қонысбай Төлеубеков жәрмеңкені аралап, тауар өндірушілермен ашық-жарқын әңгімелесті. Басқарма басшысы олардың көбін танитын болып шықты. Көкпекті ауданынан келген шаруалардың жағдайына қызығушылық танытып, жұмыстарына табыс тіледі.
Маусым айында ағыл-тегіл жәрмеңке ұйымдастырған қос ауданның басшылығына өскемендіктердің алғысы шексіз. Кіммен пікірлессек те ризашылықтарын жеткізіп жатты.
Құрал Әлібеков, Өскемен қаласының тұрғыны, зейнеткер:
– Осындай жәрмеңкелерге ет үйретіп алдық. Пайдасын да молынан көріп жүрміз. Шаруалар көктемгі егістік жұмыстарын жаңа аяқтап жатқан тұста мынадай азық-түлік тауарларының сауда-саттығын ұйымдастырған облыс басшылығына алғыстан басқа айтарымыз жоқ. Оның үстіне базардағыдай бей-берекетсіздік жоқ. Әр тауар бөлек-бөлек сатылуда. Бағасы базардан төмен. Ең алдымен, бұл біз сияқты зейнеткерлерге көп жеңілдік.
Валерий Зиновьев, Новосибирск қала-сынан келген қала қонағы:
- Біз Новосибирск қаласынан қонаққа келген едік. Расын айтса, мен қатты таңқалып тұрмын. Бұл біз үшін таңсық жағдай. Өскеменге жиі келіп жүреміз. Ендігі уақытта осындай жәрмеңкелерге асығатын болдық. Бұл бір жағынан өнім өндіруші мен сатып алушы үшін жағдай болса, екіншіден қаржы айналымы арқылы экономикалық көрсеткіштерге әсер ететін факт. Сіздің ауданның шаруаларына алғыстан басқа айтарымыз жоқ.

Дархан БЕРДІБЕК

Пікір: