Материалдар

Облыс әкімі Даниал Ахметов Ұлы Жеңіс мерекесі қарсаңында Көкпекті ауданына келді. Үш бірдей Кеңес Одағының Батырлары туған қасиетті Подгорное топырағында болып, соғыс майдангерлерінің рухына тағзым етті. Даниал Кенжетайұлы Көкпекті ауданының соғыс және тыл ардагерлерін құттықтап, Елбасының ыстық ықыласын да жеткізді.

- Шағын ғана ауылдан үш бірдей Кеңес Одағының Батыры шыққаны көп нәрсені білдірсе керек. Иван Яроцкий, Николай Фонов және Сергей Седенев сынды еліміздің қаһарман ұлдары туған ауылдың тамсанарлық табиғаты Отанға деген сүйіспеншіліктің нышанындай. Біздің міндет - осы қасиетті жерді көздің қарашығындай қорғау және ұрпақ үшін сақтап қалу. Түрлі ұлттың өкілдері тұратын Батырлар ауылы үлкен бір отбасы сияқты. Қазақстан деп аталатын біздің ұлы Отанымыз деген осы. біз біргеміз - біздің бірлігіміз бекем. Рухани мұра, тарих жәдігерлері және ортақ мәдениетке негізделген елеміздің жарқын болашағын бірге қалаймыз, - деді Даниал Кенжетайұлы.
Бүгінде барлық республика аумағына аты жақсы таныс Подгорное ауылынан Екінші дүниежүзілік соғысқа 183 адам аттанған. Қан майданнан Жеңіспен елге аман оралғандардың саны 60 жауынгерден аспайды. Жерлестерінің өшпес ерлігін есте сақтау мақсатында ауыл мектебінде Ерлік мұражайы ашылған. Мұражайдың қоры тарих парақтарынан сыр шертеді. Соғыс жылдарындағы Подгорное ауылынан шыққан майдангерлердің ерлік жолы кеңінен көрсетілген.
Аймақ басшысы ауыл тұрғындарымен кездесіп, емін-жарқын әңгіме өрбітті. Толған-дырған мәселелермен танысып, Жеңіс күні мерекесімен құттықтады. Ардагерлер және ауыл тұрғындарымен бірге мәңгілік алауға тағзым гүлін қойып, соғыс ерлерін бір минут үнсіздікпен еске алды.
Содан кейін облыс әкімі ауылдың мектебі мен жаңадан жөндеу жүргізілген клуб үйін аралап көрді. Мектептің жөндеу жұмыстарына қажетті жобалау-сметалық құжаттары дайын болғанмен, қаражат тапшылығы қолбайлау болып тұр. Жоба бойынша 14 миллион теңге қаражатқа күрделі жөндеу жұмыстарын жүргізу қажет. Ауыл тұрғындарына мереке қарсыңында үлкен сый жасаған облыс басшысы жуық арада мектептің күрделі жөндеу жұмысына 20 миллион теңге қаражат бөлінетінін жеткізді. Тиісті қызмет басшыларына сол жерде нақты тапсырмалар беріп, тездетіп жұмыстар бас-тау қажеттігіне назар аудартты.
Сонымен бірге, облыс әкімі Даниял Ахметов Самар ауылында тұратын Ұлы Отан соғысы ардагерлері Муталәп Ықласовтың үйіне барып құттықтады.
Қадірлі кәрияның шаңырағына келген облыс басшысы ардагерге құттықтау тілегін және сый-құрметін білдірді.
– Елбасының атынан, облыс жұртшылығы атынан Сізді Ұлы Жеңіс мерекесімен құттықтаймын. Бізге бүгінгідей бейбіт өмір сыйлағандарыңыз үшін әрқайсыларыңызды мақтан тұтамыз, алдарыңызда бас иеміз. Сізді құттықтауға келген осы өскелең ұрпаққа сіздер қашанда үлгісіздер. Біз сіздердің ақ баталарыңызбен көгереміз. Алдымызда ақылшы, тілекші боп аман жүріңіздер, – деп ізгі тілегін жеткізді.
Мүталәп ақсақал «Ұрпақтарымыз енді соғыс дегенді естімесін, көрмесін! Жер бетінде, Отанымызда әрдайым бейбітшілік болсын. Ең бастысы еліміз тыныш болсын, ел басқарып жүрген азаматтарымыз аман болсын, балалар бейбіт өмірдің қызығын көрсін!» деген батасын берді.

Дархан БЕРДІБЕК
Қанат АПСАДЫҚОВА

Пікір: