Материалдар

Құрметті аудан тұрғындары!

Биыл елімізде екінші рет аталып өткелі отырған Алғыс айту күнімен баршаңызды шын жүректен құттықтаймыз!
Алғыс айту күні — ең алдымен, елімізде тыныштық пен үндестік, өзара сенім мен барлық қазақстандықтарға деген құрметтің орнығуына негіз болған Президенттің бейбітшілік пен келісім саясатының салтанатты күні.
Бұл — тағдыр тәлкегімен Қазақстан аумағына еріксіз қоныс аударған түрлі этностардың миллиондаған өкілдерінің құтты қонысына айналған қасиетті қазақ жері мен қонақжай қазақ халқына тағзым ететін күн. Қазақ халқы қиын-қыстау заманда өздерінің шекесі шылқып отырмаса да, келген ұлттардың бәрін бауырына басты, барын алдына тосты. Сондықтан бұл күн — түрлі ұлт өкілдеріне қорған болған Ұлы Дала еліне деген алғыс күні десе орынды.
Көкпекті ауданының көпэтносты тұрғындары үшін де бұл Тәуелсіз Қазақстанды құру жолында аянбай тер төккен еліміздің барлық халқының ортақ тарихын құрметтеу күні.
Бүгінгі таңда киелі өңірімізден пана тауып, тамырын тереңге жайған, ұрпақ өсіріп, еңбектің зейнетін көрген талай өзге ұлт өкілдері ешкімнен қағажу көрмей тіршілік етуде. Ашық аспан астындағы татулық пен бірлікте өмір сүріп отырған татар, болгар, неміс, өзбек, ұйғыр, шешен, орыс, украин және т.б. ұлттар қасиетті өлкесін жер бетіндегі ешқандай жұмаққа айырбастамайды.

Құрметті көкпектіліктер!

Сіздерді еліміздегі ең жарқын атаулы күндердің бірі-мейірімділіктің, бүкіл қазақстандықтардың бір-біріне деген достығы мен махаббатының жарқын мерекесімен, барлық ұлттарды туғанындай қабылдаған қазақтарға алғыс айту күнімен құттықтауымызды қабыл алыңыздар! Барлықтарыңызға мықты денсаулық, әр отбасына молшылық пен татулық, ортақ Отанымызға бейбітшілік пен жасампаздық тілейміз!

Р.Сағандықов, аудан әкімі
Т.Сарманов, аудандық мәслихат хатшысы

Пікір: