Материалдар

Қыркүйек айы Көкпекті ауданында егін орағы науқанының қызған шағы. Диқан қауымы жаңа астықты жинап алу қамына кірісіп кетті. Аудан бұл науқанға бірсыпыра дайындықпен келді. Жаңа астықты жинауға көмек көрсетіліп, шаруаларға арзандатылған жанар-жағар май берілді. Ендігі міндет осы науқанды ұйымдастырушылардың іскер-лігінде. Кәсіпкерлік және ауыл шаруашылығы бөлімінің дерегі бойынша бірқатар дәнді дақылдар 100 пайыз жиналған.

- Көктемде 829 гектар алқапқа егілген көкнайза толық жиналды. Гектарына 12 центнерден айналған дақыл былтырғы жылмен салыстырғанда өнімділігін ұлғайтты. Бидай 44 мың гектер орылды. Бұл жалпы бидай алқабының 93 пайызын құрайды. Орташа өнімділік 13 центнерден. Сонымен бірге, қазірдің өзінде арпа, сұлы, тары, қарақұмық жинау 100 пайыз аяқталды. Барлығы дәнді дақылдардың 94 пайызы орылды. Астық түсімі жақсы деуге болады, - дейді ауданның бас агрономы.

Көкжайықтағы егіске қолайлы жерлер астық-тың қай түрін ексеңіз де құлпыртып жіберетін қуатқа ие. Сондай-ақ, бұл өңірде шаруаның ырысын шалқытатын тәжірибенің жинақталғанына ұзақ болған. Қысқасы, егіс алқабынан алынатын мол өнім тұрғысынан Көкжайық ауылының диқандары көш ілгері. Біз ат басын тіреген алқап Үлкенбөкен – Көкжайық тасжолының оң жақ қапталы. Алыстан көз тартқан «Елім-айдың» алтын астықты алқабында қатарынан төрт комбайнмен қызу жұмыс жүргізіліп жатыр екен. Дала төсін ұлы дүбірге айналдырған комбайндардың көзге көрінгені болмаса, бізге ең жақыны екі шақырым жерде екені бірден байқалды. Комбайнын өшірместен сұрағымызға жауап берген механизаторлар шынымен де биыл өнімнің мол екенін, жылдағыдан бидайдың ерте пісіп, жұмысқа ерте кіріскенін, биылғы мол өнімге риза екенін еш жасырмады. Арнайы сапар барысында шіліңгір ыстықты елең құрлы көрмей еңбектеніп жатқан шаруаларға таңдай қағысып, жалпы елді қуантатын бірталай шаруаның тыңғылықты атқарылып жатқанына куә болдық.

Округ әкімі Нұрбек Сүлейменов жиын-терім науқанының сәтті аяқталарына сенім білдірді. Оған толық негіз барлығын жеткізген Нұрбек Сыдықұлы іргелі шаруашылық «Рустам» қожалығының егін алқабына бастады. Қайрат Дүйсембаев басшылық ететін шаруашылық егін оруды аяқтап та қалған екен. Қосаба аумағындағы егістікте «Рустамның» агрономы Нұрлыбек Ташубаевты әңгімеге тартудың мүмкіндігі туды.

- Қособа алқабында 4 комбайн жұмыс істеуде. Алынғанына 2 жыл болған заманауи техника жұмыс тиімділігін арттырды. «Есіл» мен «Ниваның» қарқыны қарымды. Ішінде барлық жағдай жасалған жаңа комбайнмен бітік шыққан астықты орудың өзі бір рахат. Жұмысшылар жасалған жағдайға риза. Шаруашылық басшысы мехнизаторлардың еңбекқорлығына тәнті. Осылайша берекемен табиғат Ананың мол тартуын қамбаға құйып алмақпыз. Биыл 6 мыңнан астам алқапқа егістік салынды. Арпаны уақытында жинап, бастырып алдық. Бидай өнімділігі 10 центнерден кем емес, - дейді агроном.

Егін орағының басты кейіпкерлері диқандардың еңбегі осындай. Бұл өңірде орақ науқаны өз мәресіне жақын. Егін салып, Жер Ананың ырыздығына кенелемін деген шаруалардың еңбегі ақталуда. Бірақ, алда әлі де үлкен белестер бар.

Дархан БЕРДІБЕК

Пікір: