Материалдар

Ағымдағы аптада ауданымызға Елбасы Н.Ә.Назарбаев жариялаған «100 нақты қадам» ұлттық жоспарын түсіндіру жұмыстарын жүргізу мақсатында Шығыс Қазақстан облысы экономика және бюджетті жоспарлау басқармасы экономика бөлімінің басшысы Жұлдыз Мәусітқызы Жүрекбаева келіп қайтты. Кездесу барысында ел дамуына берік негіз жасайтын нақты бағыттарды аудан халқы қолдап отырғаны анық байқалды.
Билік пен халық арасындағы екіжақты еркін пікір алмасу түрінде болған кездесу ауданымыздағы тіректі елдімекен Преображенкада өтті. – Мемлекет басшысының «100 нақты қадам» немесе 100 нақты тапсырмасы қоғам өміріндегі және мемлекет дамуындағы реформаларды жан-жақты қамтиды, - деп көрсетті Жұлдыз Мауситқызы. Әрі қарай спикер қазақстандықтардың өмір сүру деңгейін көтеруге бағытталған бес институционалдық реформаларының әр тарауына жеке тоқталып, алда күтіп тұрған өзгерістер бойынша тереңдете түсіндіріп берді.

Экономикалық өрлеу және индустрияландыруды жеделдетуге бағыт-талған реформалар аясында кедендік және салықтық процедураларды оңтайландыру ұсынылады. Жекелей алғанда, бұл кедендік салықтар санының қысқартылуы, сондай-ақ, кедендік процедуралар кезінде одан өтушілерге көрсетілетін қызметтердің барынша қарапайым және ыңғайлы көрсетілуі болып табылады. Салық саясаты саласында қазіргі қолданыстағы салықтық тәртіптерді оңтайландыруды көздей отыра, салықтық кірістер мен шығыстарды есептеуді міндетті түрде жүргізу ұсынылады. Сонымен бірге, тұрғын халықтың кірістері мен шығыстарын жалпылама мәлімдеуді енгізу жоспарлануда. Салық салуды қатаң бақылау мақсатында, жеке тұлғалардың кірістері мен шығыстарын мәлім етуге кезең-кезеңмен өту ұсынылады. Бұл шара 2017 жылдан бастап мемлекеттік мекемелер мен кәсіпорындар, ұлттық компаниялардың қызметкерлеріне, 2020 жылдан бастап барлық жеке тұлғаларға қатысты айтылған. Мәлімдеуге жылжымалы және жылжымайтын мүліктерді сатып алу бойынша тіркеудегі табыс пен шығыстар жатады.
Мемлекетіміздің қарыштап басатын қадамдарының ішінде білімге айрықша мән берілуі ұстаздар қауымының көңілін қуантты. Білім беру саласында жоғарғы мектептерде жан басына қаржыландыруды және табысты мектептерді ынталандыру жүйесін енгізу, сонымен бірге, он алдыңғы қатарлы колледждер мен жоғарғы оқу орындарында экономиканың алты жетекші салалары үшін білікті мамандарды даярлап, олардың тәжірибесін басқа оқу ордаларына тарату жоспарлануда. Әрі қарай, Ж.Жүрекбаева тұрғындарды әлеуметтік қорғау шараларын тиімді жүзеге асыру үшін «100 нақты қадам» реформасы аясында жаңа форматтағы атаулы әлеуметтік көмек көрсету ұсынылатынын атап өтті. Аталмыш шара көпбалалы және аз қамтылған отбасыларға берілген арнайы мемлекеттік жәрдемақы тағайындау есебінен жүзеге асырылады.
Жаңа форматтағы атаулы әлеуметтік көмек жұмысқа қабілетті отбасы мүшелерінің барлығы жұмыспен қамтылған жағдайдың өзінде кірісі төменгі өмір сүру деңгейінің 50% төмен көрсеткіштегі отбасыларға ғана беріледі.
«Есепті мемлекетті қалыптастыру» реформасы аясында мемлекеттік органдардың қарамағындағы кез келген ақпаратқа қолжетімділік туралы заңды әзірлеу жұмысы жоспарға алынды. Сондай-ақ, мемлекеттік органдар басшыларының тұрғын халық алдындағы жетістіктерін ашық есеп беру арқылы айту тәжірибесін енгізу ұсынылды. Сонымен қатар, олардың есебін ресми сайттарға орналастыруын қадағалау жоспарлануда. Негізгі мемлекеттік органдардың статистикалық деректер қорын онлайн режиміне қосу ісі де қолға алынбақ. Онда барлық бюджеттік және шоғырландырылған қаржылық есеп, сыртқы қаржылық аудит нәтижелері, мемлекеттік саясаттың тиімділігі мен сапасын бағалау қорытындылары, республикалық және жергілікті бюджетті игеру есебі орналасатын болады.Реформа аясында халыққа қызмет көрсету орталықтарын бір жүйеге біріктіруге арналған «Мемлекет азаматтар үшін» атты мемлекеттік корпорация құру ұсынылған. Ел азаматтары барлық мемлекеттік қызметтерді бір орталықтан алатын болады. Осындай тұрғындарға оңтайлы шаралар тек жақсы нәтиже көрсетеріне сеніміміз мол. - Бүгінде біз, бүкіл қоғамдық қатынастар жүйесін кең көлемді жаңғырту жолымен мемлекет дамуының жаңа кезеңіне аяқ басып келеміз. Реформа жарияланған сәттен бергі барлық жұмыстар қатары игілікті және берік түрде іске асырылуда. Бұл орайда, сіздердің сенімдеріңіз бен белсенді түрде қолдау танытып, әрекет етулеріңіз маңызды, - деп сөзін аяқтады Жұлдыз Мәусітқызы.
Әрине, мемлекет тарапынан қолға алынып жатқан шаралар тек халық игілігі үшін атқарылып жатқаны игі. Себебі, елдің басты байлығы оның азаматтары екені хақ.

Жансая СМАҒҰЛОВА

Пікір: