Балаларға базарлық. Тассай түлектері туған ауылына ойын алаңын орнатып, бүлдіршіндерді қуантты. М.Әуезов атындағы орта мектептің 1997 жылғы түлектері ауылдың бүлдіршіндеріне тосын сый жасап, ерекше өнеге үлгісін көрсетті. Игілікті істің басы-қасында болып, сәтті жүзеге асуына барынша атсалысқан ауыл әкімі Ержан Мазыбаевтың іскерлігіне тассайлықтар тәнті.

Өткен аптада балалар ойын алаңының ашылу салтанаты өтті. Қызылды-жасылды шарлармен, жалаушалармен безендірілген ойын алаңы балақайлар мен ата-аналарға, ауыл тұрғындарына лық толды. Ойын алаңының ашылу салтанатына аудан әкімінің орынбасары Марат Теміржанов қатысып, құттықтау сөз сөйледі.

Сыныптастарының басын қосып, осындай үлкен істі қолға алған тассайлық азамат Архат Мауытбековты әңгімеге тарттық.
- Бүгін балаларымыз үлкен қуанышқа кенеліп отыр. Неше - түрлі әткеншектерде тербеліп, жұмсақ құм үстінде ойын ойнап, таза ауамен демалу кезінде отыратын орындықтармен жабдықталған ойын алаңы туған ауылымызға деген сыйлығымыз. Осы алаңды балалар үшін ұйымдастырдық. Жұмыс барысында барлық жағынан көмегін аямаған ауыл әкіміне, игілікті іске атсалысқан азаматтарға ризашылығымызды білдіреміз, - дейді.
Салтанатты рәсімнен соң ойын алаңына бет алған бүлдіршіндер өздеріне шақталып жасалған әткеншектерде тербеліп қана қоймай, демеушілердің сый-сияпатына бөленді. Саябаққа келген барлық бүлдіршіндерге тіл үйірер балмұздақтар үлестірілді.
Көңілдің гүлі, көздің нұры саналатын балаларға қуаныш сыйлап, олардың білім алып, дене және рухани дамуы үшін лайықты жағдай жасау үшін барынша жақсылықтар жасалуда. Қазір балалар жаңадан бой көтерген алаңда асыр сап, құмарлары қанғанша ойнайтын болды.

Дархан БЕРДІБЕК

Пікір: