25 жыл – бұл тәуелсіздікке қадам басқан еліміздің қылшылдаған жастық кезеңді алғаш бастан өткерген уақыты. Осы аралықта өмірге көзқарасы, дүниетанымы, сапалық қасиеттері мүлдем жаңаша ұрпақ қалыптасып үлгерді десек қателеспегеніміз. Олай дейтініміз, мектеп табалдырығын аттаған сәттен-ақ, бойына біткен көшбасшылық қабі-летімен, білімге құштарлығымен, ерекше талантымен көзге түсіп, жұлдызша жарқырайтын балалар көптеп кездесіп жүр. Олар ХХI ғасырдың, жаңа заманның ой-санасы толығымен азат, еркін азаматтары, өскелең ұрпақ.

Мәселен, Ж.Шайжүнісов атындағы орта мек-тептің 2 сынып оқушысы, кішкентай ғана дарынды қыз Еркежан Алтынбекованы солардың қатарына қосуға толық негіз бар. Мектеп табалдырығын аттағанына аз ғана уақыт болса да, оқу үздігі Еркежан бірқатар жетістіктерге қол жеткізді. Анасы Әсел мен әкесі Бейбіт Сабировтардың айтуынша, қыздары бастауыш сынып оқушылары арасында беделге ие болып, мектеп өміріндегі, сыныптағы шараларға бар ынтасымен қатысатын көрінеді. Өткен оқу жылында «Көктем Аруы-2015» байқауынан бас жүлдені жеңіп алса, халықаралық «Логика әлемі» сайысында білімділігі мен ойының ұшқырлығын көрсетіп, 1 орынға қол жеткізген.
Ал, уақытын тиімді пайдалануға әдеттенген Еркежан жазғы демалыс лагерінде де белсенділігінен танбаған. Ол, тіпті, әлден-ақ үш тілді меңгеруге ден қойып, ағылшын, орыс тілдерін үйренуге қызығушылығы артуда. Ата-анасы қызының қабілет-қарымын байқап, оны ұштай түсуге күш салатындарын, болашағынан зор үміт күтетінін жеткізеді.
Біз де дарынды балаларды дамыту үшін мемлекет тарапынан жасалып жатқан жағдайды ұстаздар мен ата-аналар тиімді пайдаланар деген сенімдеміз. Өйткені, еліміздің жарқын болашағының тізгінін ұстар білімді ұрпақ толқыны көз алдымызда қалыптасуда.

Бақыт МҮЛІКОВА

Пікір: