Әкем, анам, көңіл қойса, дем беріп,
Спортты біз сүйер едік тең көріп.
Салауатты өмір салтын сақтайық,
Спорт қана қамалымыз ең биік, - демекші Ж.Болғанбаев атындағы Самар орта мектебінде Қазақ хандығының 550 жылдығына арналған отбасылық «Әкем, анам және мен» атты спорттық жарыс өткізілді.
Жарысқа бастауыш сынып оқушылары мен ата-аналары қатысты. Қатысушылар өз отбасының төсбелгісімен, ұранымен, біркелкі формасымен ерекшеленді. 2«а», «ә», 3«а», «ә», «б» сыныптарының намысын қорғаған Сармановтар отбасы «Паровоз жүрісі», «Арқан тартыс», «Секірмемен секіру» ойынында өз шеберліктерін көрсете білсе, Ахметзәки отбасы «Доппен жүгіру», «Теңге алу» сайыстарында ерекше көзге түсті. Советовтар отбасы «Теңге алу», «Арқан тартыс», «Паровоз жүрісі» ойынында ептілік көрсетіп, Сейілқұмаровтар отбасы әкелер сайысында мергендік қасиетімен ерекшеленді. Ал, Оразбаевтар отбасы «Доппен жүгіру», «Секірмемен секіру» жарысында жылдамдылықтарын көрсетті.
Жанкүйерлерінің делебесін қоздырып, тартысты өткен спорттық ойындар мәресіне жетіп, әділқазылар шешімімен 2 «а» сыныбынан қатысқан Сармановтар отбасы І орын, Ахметзәки отбасы ІІ орынды иеленді. 3 сыныптар арасында І орын Советовтар отбасы алса, ІІ орынды Сейілқұмаровтар мен Оразбаевтар өзара бөлісті.
Ата-ана мен бала арасындағы, қарым-қатынасты нығайта түсуіне септігін тигізген, спорттық ойынға қатысушыларды мектеп директорының тәрбие ісі жөніндегі орынбасары С.Құсайынова жеңістерімен құттықтап, мақтау грамоталары мен сыйлықтар табыстады.
«Отбасы - ұлағат ұясы», - дегендей, салауатты өмір салтын ұстанатын, қайсар, биік рухты отбасылар көбейіп, қазақ елі мәңгі жасасын. Елбасымыздың Нұрлы жолымен болашаққа нық басайық!
Зере Тамызғазина, Ж.Болғанбаев атындағы орта мектептің 6 «а» сынып оқушысы, Самар ауылы

Пікір: