Қазірде елімізде Елбасының тапсырмаларына орай, ауылдың ахуалын жақсарта түсуге, ауыл шаруашылығын одан әрі дамытуға баса назар аударылып отыр. Ол үшін шағын ауылдағы тұрғындардың әлеуметтік жағдайдан туындайтын мәселелерін түпкілікті шешу керек. Осы орайда Көкжайық ауылдық округіндегі Ақой, Қарамойыл ауылдарының бай да бақуатты тұрмыс-тіршілігі жөнінде айтпасқа болмас.
Ауылдарды көркейтудегі игі бастамалар мен жарқын істерге мұрындық болып отырған «Талап» шаруа қожалығы. Екі ауылдың тұрғындарының көбі осы қожалықтың егіс танаптарында, шабындықтары мен жайылымдықтарында жұмыс істейтін еңбекшілер. Қарамойыл ауылы 200 жылдан астам тарихы бар шежірелі мекен. Ауыл кішкентай болса да ауылдан шықан азаматтары ел үшін үлкен қызмет, зор іс атқарып жүр. Соның бірі 2015 жылдың мамыр айында оқу жылы аяқталысымен ауылдық шағынкомплектілі мектебін жабу мәселесі туындауымен басталды. Ауыл тұрғындары, егер тұрғылықты жерлерінде мектеп болмаса басқа жаққа көшуге әрекеттене бастады.
Міне, осы сәттерде «ауылымнан ел кетпесін»- деп, елдің қамын ойлаған «Талап» шаруа қожалығының басшысы Жұмабек Құрмашұлы Күшікбаев болды. Ол ауылдан мектепке лайық ғимаратты сатып алып, жөндеу жұмыстарын жүргізуге мердігер жалдады. Бас-аяғы 25 күннің ішінде отыз орындық шағын комплектілі мектеп үйі даяр болды. Мектепте 4 сынып бөлмесі, басшы кабинеті, мұғалімдердің әдістемелік залы, тазалық құжырасы бар. Аулада спорт және ойын алаңдары жасақталған. Ауланың қоршауы, аумағында егілген гүлдері аса бір ыждаһаттылықпен ұқыпты жасалған.
Шағын комплектілі мектептің директоры, бас-тауыш мектептерде білім берудің үздігі Айгүл Сейдахметқызы Сыздықова: «Ауыл ортасында аппақ шаңқаңдай асқақтаған ақ мектеп – «Карамойыл ауылының Ақмектебі» дегенге әбден лайық. Қазір мектепте 1-ші сыныптан 4-ші сыныпқа дейін 8 сынып жасақталды, мектепке дейінгі даярлық сыныбына 1 сынып ашылды. Мұғалімдерге толық тарификация жасалып, сағаттары бөлінді. Мектепте білім беру қазақ және орыс тілдерінде жүргізіледі. Биыл 1-ші сыныптан бастап ағылшын тілінде де оқытамыз» - дейді, мерекелік көңіл-күймен қатар жаңа мектептің құрылысына деген ризашылығын жасыра алмай.
Кішкентай ауылдың үлкен қуанышын бөлісуге алыс-жақыннан көптеген адамдар келді. Тіпті, сонау Алманиядан келген, ауылдың бұрынғы тұрғыны, Леонид Браун да осында жүр. «Туған ауылымның тойына келгенімді жақсылыққа жорып, қазақтар айтпақшы «құтты қонақ» болып жүрмін»- деп қояды. Салтанатты жиында құрылысшыларға да қошемет пен алғыс айтылды. «Талап» шаруа қожалығының басшысы Жұмабек Құрмашұлы: «Бүгінгі мейрам оқушылар мен мұғалімдер үшін. Дүниеде бала қуанышынан асқан не бар. Мен үшін алақайлап қуанып, асыр салған баланы көру - барлық марапатқа тұрарлық» - дейді. Мектептің ашылуы салтанатында Қапез Баймолдин, Ермек Ақшолақовтай абыз ақсақалдар батасын беріп, әжелер шашуын шашты. Ауылдағы әр ұлттың әні бір әуенмен асқақтап, билері бір ырғақпен толқыды. Достық пен берекенің мейрамы әр үйде, әр отбасында жалғасып жатты.
Қайрат Мәлікаждар, Қарамойыл ауылы

Пікір: