Ауыл – қашан да қазақтың алтын бесігі, ұлттың тозбас темірқазығы. Ал ауыл ахуалының жақсаруы тұрғындар үшін де жақсылықтың нышаны болмақ. Ауылдың әрбір мәселесі шешімін тауып, мұндағы елдің еңсесі көтеріңкі болса, болашақ та баянды. Ежелгі мекеннің мұңы тарқаса, бұл да егемендіктің ерен көрінісінің бірі.
Ауыл тұрғындары үшін ауыз су, жол мәселесі бірінші орында. Жыл сайын мемлекет тарапынан ауылдарды көтеру мақсатында бағдарламалар дайындалып, тиісті қаражат көзі қарастырылуда. Мұндай игі жұмыстар бүгінде Көкпекті ауданында да атқарылып, әкімдік тұрғындардың тілегін орындап келеді.

Көкпекті ауылдық округіне қарасты Ажа, Толағай, Ұзынбұлақ, Шәріптоғай елді мекендеріне арнайы барған жұмыс тобы атқарылып жатқан бірнеше ауқымды жұмыстардың куәсі болды.
Жұмыс тобын алдымен жыл сайын ажары кіре бастаған Ажа ауы-лына апарған округ әкімі Қайрат Алғазыұлы, атқарылып жатқан жұмыс барысымен таныстырды:
-Ажа ауылы аудан орталығынан 14 шақырымда орналасқан. Жалпы халық саны - 210 адам. Мұнда ауыл тұрғындары көбіне мал шаруашылығымен айналысады. Бұл ауыл үшін ең өзекті мәселе ауыз су болған. Су – ырыс көзі, тіршілік бұлағы болғандықтан да, ауыл тұрғындары үшін ауылды ауыз сумен қамту мәселесі қарқынды жүріп жатыр.
- Көкпекті ауылдық округіне қарасты Ажа ауыл тұрғындарын ауыз сумен қамту мақсатында 2019 жылдан бері су жинағыш (водозабор) құрылысы жүргізілуде. Бүгінгі күнде су жинағыш құрылысы толығымен аяқталып, ендігі кезекте ауыл ішіне су құбырын тарту жұмыстары басталды. Жоба бойынша Ажа ауылының ішінен 3 су алу бағаналары (колонка) орнатылатын болады. Ажаға «КазГерСтрой» ЖШС демеушілігімен 2,5 шақырым кіре беріс жолын және 3,5 шақырым ауыл іші жолдарына тегістеу жұмыстары жүргізілді, көшелері жарықтандырылған. Жергілікті тұрғындар бұрын бастаудан, бертін келе әркім құдық қазып, ауыз су қолданған. Құдық суы кейіннен тұщыланып, суды аудан орталығынан тасып ішкен. Енді санаулы күндерден соң, таза ауыз су мәселесі толық шешіледі, -деді ауыл әкімі.
Сонымен қатар, шағын ауылда білім ордасы «Романов негізгі мектебі» орналасқан. Мектепті 25 жылдай білікті басшы Әділбек Каусов басқарып отыр. Аталмыш білім ордасында 37 оқушы білім алып, 17 мұғалім еңбек етуде. Шағын ауыл мектебінде білім алған түлектердің аудан мектептері арасында жеткен жетістіктері көп. Алдағы уақытта мектептің атауын « Кегенбай би» болып өзгерту жоспарда тұр.
Ал, Ұзынбұлақ пен Толағай ауыл тұрғындары үшін блокті модульды станциясы іске қосылуда.
Шәріптоғай ауылындағы клуб үйі аудан әкімі Асхат Сайдахметұлының қолдауымен жаңа кейіпке енуде. Ғимарат көп уақыт күрделі жөндеу көрмей, қараусыз жатқан болатын. Құрылыс жұмыстары мұнда биыл жаз бойы жүргізілді. Құрылысшылардың дені – ауыл тұрғындары. Бұл жұмыс орны – олар үшін нәпақа табу көзі.
Бүгінде елді мекендер еңсе тіктеп, ауылда жоспарлы істер ойдағыдай жүргізілуде. Жоспар ауқымды, жұмыс қарқынды. Күн өткен сайын Көкпекті ауылдық округіне қарасты шағын ауылдардың ахуалы жақсарып келеді.

Пікір: