Қарттарым, жүректерің неткен дархан,
Көтерген тұрмыс жүгін сенің арқаң.
Жолыңды жүріп өткен қарасам мен,
Оқитын келешек бір-бір дастан, – дегендей асыл қазына, арқа сүйер тірегіміз қарияларымыз аман-есен жүре берсін. Үлкенді силау, оларға құрмет көрсету – ата-бабадан келе жатқан салтымыз. Ақжаулықты әжелер мен ақсақалды қарттарымыздың көңілдерін көтеру мақсатында қарттар күніне орай Теректі ауылының «Жансая» дәмханасында «Қарттарым – асыл қазынам» атты мерекелік іс-шара өткізіліп, кең дастархан жайылды.

Мерекелік іс-шара ауыл әкімі Қ. Айпқазыұлының құттықтау сөзімен басталды. Ауыл қарияларына арнап А. Кунафин, М. Кодекова, К. Токтарбаева сазды да көңілді әндерін тарту етті. Қарияларымыз да өз әндерін айтып, би билеп, әңгіме-дүкен құрып, ақ баталарын беріп, алғыстарын білдірді. Ардагер ұстаздарды төл мерекесімен және ақсақалдар алқасының төрағасы Ә. Багадиевті торқалы 90 жасқа толуымен құттықтады. Сондай- ақ ақжаулықты әжелеріміз М. Кузембаева, Н. Бытымбаева, Н. Ракишева қазыналы қарттар күнімен қатар келген туған күндерінде ауыл әкімнің мадақтама қағаздармен марапатталды.
Мерекелік дастарханды ұйымдастыруға демеуші болған ауылымыздың жеке кәсіпкері Жанатаева Толқын, «Боғас» шаруа қожалығының басшысы Д.Қарықболов пен «Жұмағұл» шаруа қожалығының басшысы Ж.Тоқтарбаевқа шексіз алғысымызды білдіре отырып, отбасыларына амандық, еңбектеріне табыс тілейміз. Ал асыл қарияларымызға ұзақ өмір, қадірлі қарттық тілейміз.

Теректі ауылдық округінің әкімдігі

Пікір: