Ағымдағы жылдың 2-3 наурыз күндері аудан әкімі Асхат Сайдахметұлы Смаилов Көкпекті және Самар ауылдарында кезекті қабылдауын өткізді. Қабылдауда аудан тұрғындары өз өтініштерімен келіп тиісті жауаптарын алды. 

2 наурыз күні Көкпекті ауылында өткен қабылдауға барлығы 4 адам жазылып, 2 адам қабылдауға кірді. Алғашқы болып, Қ.Аухадиев ауылдық округінен келген Ғалия Хайбулина немерсіне ота жасау үшін материалдық көмек сұрап келіпті. Көз жасына ерік берген азаматшаның өтінішіне аудан басшысы Заң аясында қарастырылатынын айтып өтті. Ал үлкенбөкендік Г.Кожаеваның өтініші атаулы әлеуметтік көмек алу төңірегінде болды. Ол құжаттарын рәсімдеу кезінде кеткен қателіктердің кесірінен осы уақытқа дейін тиісті жәрдемақыны ала алмай келеді. Бұл мәселені дер кезінде шешу үшін бөлім басшысы Нұрбек Сүлейменовке бірқатар тапсырма берілді.

Аудан әкімінің қабылдауында болған тұрғындар өз өтініштері бойынша қанағаттарлық жауап алып тарқасты. Ал Самар ауылында жаңадан ашылған адалдық алаңында өткен аудан әкімінің қабылдауында Палатцы, Сарыбел, Самар ауылдарының азаматтары болды.
Палатцы ауылдық округінің ардагерлер кеңесінің төрағасы В.Кронвальд «Алтай» ШҚ берілген мүліктік пай мәселелері бойынша өтінішін білдірді.
- Бұл мәселе мұқият қарауды талап етеді және даулы мәселелерде сот органдарына жүгіну керек. Біз өтініштің барлық аспектілерін қарауға және қолданыстағы заңнама аясында жауап беруге тырысамыз, - деп атап өтті аудан әкімі.
Сарыбел ауылының тұрғыны, төрт баланы тәрбиелеп отырған көпбалалы ана М.Догыр мектеп жасындағы екі баласы спортқа бейім екенін айта келе, жарыстарға бару үшін жалғызбасты ананың қалтасы көтермейтінін жеткізді.
Самар ауылының спорт кешендерінде бокс секциясының жоқтығы туралы өтінішті жас маман жаттықтырушы білдірді. Асхат Сайдахметұлы спорт бөліміне осы мәселені егжей-тегжейлі анықтап, бокс бойынша жаттығуларды өткізу үшін кесте жасауды тапсырды.

Канат АПСАДЫҚОВА
Клара ҚАЙЫПЖАНҚЫЗЫ.

Пікір: