23 наурыз күні облыс орталығында Көкпекті ауданының ауыл шаруашылық өнімдері жәрмеңкесі өткізілді. «Fresh Marcet» сауда кешенінің аумағындағы сауда-саттық Ұлыстың Ұлы күні – Наурыз мерекесіне арналды. Көкпектіден жеткен мол әрі арзан өнімге Өскемен тұрғындарының сұранысы жоғары болды.

Мерекелік жәрмеңкеге аудан аумағындағы шаруа қожалықтары мен тауар өндірушілер қатысып, төл өнімін ұсынды. Аудан әкімінің орынбасары Дәурен Қойгелдин берген мәлімет бойынша, бұл күні жәрмеңкеде 1.5 тонна жылқы еті, 3 тонна ірі қара еті және жарты тонна қой еті әкелінген. Сондай-ақ бал, картоп, орамжапырақ, балық және тағы басқа да өнімдер сатылымға шығарылды. Әдеттегідей жәрмеңкеге шығарылған өнімдердің бағасы қаланың басқа коммерциялық базарларына қарағанда 10-15 пайызға төмен.

- Бірінші кезекте қала тұрғындары осындай мол әрі арзан бағалы өнім ұсынып отырған ауыл еңбеккерлеріне ризамыз. Сапасы жоғары және қолдан өндірілген өнімнің оңайлықпен келмейтінін мен жақсы білемін. Осындағы әрбір өнім маңдай тер мен таза еңбектің жемісі. Қала тұрғындары үшін ауылдың жәрмеңкесі мол мүмкіндік туғызады дейді, - өскемендік Қанайбек Нұрханов.
Жәрмеңке аясында базаршы бұқараға ауылдың дәмі ұсынылды. Аққала ауылдық Октябрь мектебінің ұжымы ыстық шай мен тіл үйірер палау таратты. Тегін аспен бірге басты мәзір Нау-рыз көже де ұмытылмады. Орталық аурухана арулары ұлттық дастархан жайып, келушілерге Нау-рыз көже ұсынды.

Дархан БЕРДІБЕК

Пікір: