Көкпекті ауданы әкімінің м.а. Жаслан Талғатұлы Майкенов Самар ауылдық округінің тұрғындарымен кезекті қабылдау өткізді. Қабылдауға келген тұрғындардың мәселелері әр түрлі сипатта орын алды.

Мысалы, Палатцы ауылының тұрғыны В.Шевкопляс кәмелет жасына толмаған жиендеріне төленетін қамқорлық қаражатының тоқтатылғаны туралы мәселені көтерді. Бұл сұрақтың заң аясында анықталуын аудандық білім бөлімінің басшысы Ш.Н.Мұстафиноваға тапсырды.
Мариногорка ауылының тұрғыны Е.Әжікенева ұлын бір топ адамның ұрып-соққандығы жайында айта келіп, сотқа дейінгі тергеу барысында істің мән-жайын анықтау жұмысына өзінің көңілі толмайтындығын жеткізді. Самар ПБ бастығының орынбасары Қ.Ж.Меткенов арызданушыға сотқа дейінгі тергеу барысы бойынша және жоғары сот органдарына шағымдану құқығы туралы толық түсінік берді.

Мариногорка ауылдық округінің жас маманына «Дипломмен ауылға» бағдарламасын қолдану ережелері және төленетін қаржылай көмек пен үй алу мәселесі түсіндірілді.
Тұрғын үй алу мәселесі күн тәртібіндегі ең өзекті мәселенің бірі болып қала береді. Бұл жолы Миролюбовка ауылының тұрғыны, көпбалалы ана Г.Тоқтарбаева да осы мәселе бойынша өзінің сұрағын қойған болатын. Тұрғын үй алуға көмек көрсету ісінде Миролюбовка ауылдық округінің әкімі С.Қасымханов істің мән-жайын анықтау, әкелерін өзінен бөлек тұратын балаларына көмек жасауға тарту жөнінде дәлелдемелер келтірді.
Кездесу барысында аудан әкімінің м.а. Ж.Т.Майкенов аза-маттардың өтініштерін орындау бойынша хаттамалық тапсырмалар берді және жауапты тұлғалардың оларды орындағанға дейін бақылауда ұстауын талап етті.

Пікір: