Өткен аптада біздің ауданға Қазақстан Республикасы Парламенті Мәжілісінің депутаты Берік Сәлімжанұлы Дюсембинов келді. Жуырда жарияланған Елбасының Жолдауын халыққа насихаттау мақсатымен келген лауазымды қонақ аудан орталығында Қ.Алтынбаев атындағы мәдениет үйінде халықпен кездесіп, мұң-мұқтаждарын тыңдады.

Мәжіліс депутатымен бірге ШҚО Мемлекеттік еңбек инспекция басқармасының басшысы Бақытбек Құрманбекұлы Қизатов болды. Кездесуді кіріспе сөзбен бастаған аудан әкімінің орынбасары Ерлан Қабайұлы Қалдыбаев қонақтарды таныстырып, сөз кезегін Берік Дюсембиновке берді. Берік Сәлімжанұлы жылы шыраймен, ақ көңілмен қарсы алғандарына рахметін айтып, Елбасының сындарлы саясаты төңірегінде сөз қозғады.
- Сапар барысында біз Президентіміз белгілеген міндеттердің алыс ауылдарға да жетіп, жүйелі түрде орындалып жатқанына тағы бір мәрте көз жеткіздік. Ең бастысы, мемлекеттік бағдарламалар орындалуда, демек, осының бәрі халық игілігіне бағытталып жатқаны қуанышты. Елбасының Қазақстан халқына арнаған әрбір Жолдауы ел халқының бірлігін, әлеуметтік толысуы мен өмірін жақсартуды көздейтінін атап өтті. Сондықтан бізде мақсат та, жоспар да, тапсырма да бар,- деді депутат.
Кездесу барысында көкпектіліктер өздерінің ұсыныстарын жеткізіп, қызықтырған сауалдарын қоя алды. Оларды тыңдаған Мәжіліс депутаты өз құзыры жеткенше сауалдардың шешімін табуға көмек қолын созатындығын ескертті. Мәжіліс депутатының жұмыс сапары Самар ауылдық округінде жалғасты.

Клара ҚАЙЫПЖАНҚЫЗЫ

Пікір: