Қазан айы тек қана қайырымдылық айы емес. Ол 1 қазан –Қарттар күнінен басталатын жылы кездесулер мен қауышулар, ыстық ықыластар мен бата тілектерге толы ай.
Бұл күні Самар өңіріндегі ортамызда аман жүрген үш соғыс ардагері П.А.Балахонов, М.Ықласов және В.С.Федосоваға аудан әкімінің орынбасары А.Ж.Әкімова аудан әкімінің атынан ыстық ықыласы мен бағалы сыйлықтарды табыс етті. Сарыбел ауылында тұратын соғыс ардагері П.Балахонов аудан әкімінің жыл сайын осы мерекеде қалдырмай құттықтайтынына алғысын айта отырып, еңбегіне табыс және денсаулық тіледі.

Мүтәлап ата мен Валентина Степановна Алмагүл Жанахмет-қызына және Самар ауылдық округінің әкіміне ақ баталарын беріп, көрсеткен құрметтері үшін алғыс айтты. «Бізге қазір сыйлықтан гөрі сіздердің ыстық ілтипаттарыңыз қымбат. Ешқашанда назардан тыс қалдырмайтындарыңыз үшін шексіз алғыс айтамыз. Бейбіт күн тілейміз», - дейді ақ ниетті ардагерлер.
Сіздер аман болыңыздар, қымбатты ардагерлер! Ұрпақтарыңыз сіздердің қажырлы еңбектеріңізді ешқашанда жадынан шығармайды.

Клара НҰРПЕЙІСОВА

Пікір: