Атақты сатирик Сейіт Кенжеахметұлы: «Күлдіре білу - өнер, күле білу - өмір» деп текке айтпаса керек. 14 шілде күні жастардың сүйікті әзілкештері «Альянс» Семей жайдарман тобының концерті болып өтті. Жалынды жастарымыз жайдары жандарды жылы құшақпен қарсы алды. Көкпекті көгін күлкіге бөлеп кеткен көңілді жігіттердің құрылғандарына биыл бес жыл толды. «Альянс» сөзі грек тілінде ұйымшылдық, достық деген мағынаны береді екен. Аты затына сай топ жігіттерінің шынымен де, өте ұйымшыл, бір отбасындай бірлігі берік достар екені көрініп тұр. Концерт барысында Көкпекті жастарының актерлік шеберліктерінің куәсі болдық. Осындай шараның ұйымдастырылуы - ауданымыздың «жолбарыстай қайраттыларының» көңілін-дегісін тап басатын аудандық жастар орталығының белсенді жұмысының дәлелі. «Міне, көрікті Көкпектіге екінші рет келіп тұрмыз. Бізді тағы да үлкен ықыласпен қарсы алып отыр. Сол үшін де біз өте қуаныштымыз. Көрермендердің бүгінгідей көп болғаны шабытымызды еселей түсті. Жастардың бізге деген осындай ықыласы мен қошеметі азаймаса, тағы да келіп, көңіл көкжиектеріңізді барынша көтеруге дайынбыз», - деп сөз сабақтады топ жетекшісі Еркебұлан Еңкебаев.

Жансая СМАҒҰЛОВА

Пікір: