Көкпекті ауданында қатты желдің әсерінен бірнеше ауыл жарықсыз қалды. Дауылдан зардап шеккен Көкпекті, Тассай, Көкжайық және Үлгілімалшы ауылдарында 8 әлеуметтік нысанның, 30-дан астам жеке тұрғын үйдің шатырын жел ұшырып кетті. Сондай-ақ электр желісі бағандары мен ағаштардың құлаған жағдайлары тіркелді.
Бұл туралы аудан әкімі аппаратының төтенше жағдайлар және мобильдік дайындық бөлімінің басшысы Расул Сарманов хабарлады. Адам шығындары мен зардап шеккендер жоқ. Қазіргі уақытта аудан бойынша дауыл салдарын жою, қалпына келтіру жұмыстары жүргізілуде.

Маманның мәліметі бойынша 2 маусым сағат 19.00-ден 23.00-ге дейін желдің жылдамдығы секундына 22 метрге жеткен. Көкпекті ауылындағы Ж.Шайжүнісов атындағы орта мектеп спортзалының, аудандық орталық ауруханының, Үлгілімалшы ауылындағы Абай атындағы орта мектебі от жағу қазандығының, Көкжайық ауылындағы әкімшілік ғимаратының, «Бөбек Лүпілі» балабақшасының, «Елім-ай» шаруа қожалығы мал бордақылау алаңының, Тассай ауылындағы Мұхтар Әуезов атындағы орта мектеп және интернат ғимараттарының шатырын жел ұшырып кеткен болатын.
Биғаш, Үлгілімалшы, Ұзынбұлақ, Тассай, Көкжайық, Көкпекті елді мекендерінде авариялық ажырату салдарынан мыңға жуық тұрғын жарықсыз қалды. Қазіргі уақытта ШҚ АЭК авариялық бригадаларының үздіксіз жұмысы нәтижесінде барлық ауылдарға жарық қосылды.

Виктория ГАРМАШОВА 

Пікір: