Бүгін сағат 00:00-де Көкпектіде шектеу шаралары енгізілді
Аудан орталығына кіретін 3 бағыт бойынша блок-пост қойылды. Аудан әкімі Асхат Смаилов пен аудандық ішкі істер бөлімінің басшысы Жанболат Асқар бекеттерді аралап, жұмыс барысын тікелей қадағалады.

Блок-постар Самар ауылы, Жарма және Зайсан мен Тарбағатай аудандарына шығатын жол бойында орын тепті. Онда полиция және мемлекеттік қызметкерлер, санитарлық қызмет өкілдері тәулік бойы жұмыс істейді. Кіріп шыққан барлық жолаушылардың дене қызуы тепловизормен өлшеніп, жеке деректері журналға тіркеледі. Қазіргі уақытта келіп-кетушілердің барлығы өткізіліп жатыр. Бірақ әрбір жолаушының құжаты мен денсаулығы мұқият тексерілуде. Әрбір автокөлікке дезинфекция жасалуда.
Көкпекті ауданы бас санитарлық дәрігерінің Қаулысына сәйкес, арнайы рұқсатсыз аудан орталығына кіруге және одан шығуға тыйым салынды. Айта кету керек, азық-түліктер мен басқа да қажетті заттарды жеткізу үшін «жасыл дәліз» сақталады.
Көкпектіде енгізілген шектеу шараларына байланысты 16 сәуір күні аудандық газеттің арнайы шығарылымы жарық көреді.

Пікір: