Бүгінгі таңда туған жердің тазалығы күн тәртібіндегі ең бірінші мәселелердің бірі болып тұр. Өткен жұма күні аудан әкімі Асхат Сайдахметұлы Смаиловтың тапсырмасы бойынша Көкпекті ауылында орын тепкен Жеңіс саябағында ауылдық округ апаратының ұйымдастыруымен сенбілік өтті.
Аудан орталығы Көкпекті ауылы тоғыз жолдың торабында орналасқан тұрғындарының тұрмысына жайлы мекен. Көшелері жылдан жылға көркейіп, ғимараттар да жаңартылып жатыр. Халық игілігі үшін қызмет атқаратын көптеген мекеме мен ұжымдар өз істерінің нағыз майталмандары. Міне, осындай елді мекендегі Жеңіс саябағында өткен сенбіліктің нәтижесі көз қуантарлық деп айтуға негіз жоқ.

Көкпекті ауылдық округі әкімдігінің берген ақпаратына сүйенсек, ауылдағы барлық мекемелерге сенбілік өтеді деп құлақтандырылған болатын.
Аталмыш сенбілікке қатысқан Көкпекті орта мектебі, Ж.Шайжүнісов орта мектебі, Өнер мектебі, Көкпекті ауылдық округі әкімдігі, Аудандық мұрағат, Аудандық редакция ұжымы, Жұмыспен қамту орталығы Аудандық аурухананың ұжымдары сенбілікте саябақтағы шыршалардың түптерін ретке келтіру және қоқыстардан тазалау жұмыстарын жүргізді.
- Науқандық жұмыста көп болып бірігіп, туған жердің гүлденуіне бәріміз атсалысуымыз керек, – деді ауылдық округ әкімінің орынбасары Нина Укешова. - Алайда, «Көкпекті аудандық қорғаныс бөлімі», ауыл шаруашылық бөлімі, үйде арнаулы қызмет көрсету орталығы, Мәдениет үйі, ауылдағы 3 балабақшаның ұжымдары, Экономика және қаржы бөлімі, Жер қатынастар бөлімі, Білім беру бөлімі, Жастар орталығы, коммуналды шаруашылық ұжымы сенбілік ұйымдастырылған күні қарасын да көрсетпей тазалық жұмыстарына бей-жай қарады.
Ұлы Жеңісті алып берген ардагерлерімізді еске алатын қасиетті орынның тазалығына қол ұшын тигізбеген, сенбілікке шықпаған мекемелер қарапайым тұрғындарға қай жағынан үлгі бола білді? Сонда, біздің ардагерлерге жасаған құрметіміз осы болғаны ма?
Ауылымызды гүлдендіріп, көшелерімізді көркейтеміз десек санитарлық тазалықты өзімізден бастағанымыз жөн болар. Туған өлкенің тазалығын қадағалау әрбір тұрғынның азаматтық парызы екенін естен шығармайық!

Пікір: