Құрметті байланыс және ақпарат саласының қызметкерлері!

Сіздерді кәсіби мерекелеріңіз – Байланыс және ақпарат қызметкерлері күнімен шын жүректен құттықтаймыз.

Биылғы жылы бұл мереке айрықша маңызға ие болып отыр. Бүгінде барша қазақстандықтармен бірге Көкпекті ауданы тұрғындары да аса зор саяси және қоғамдық маңызы бар айтулы оқиға – елордамыз Астананың 20-жылдығын атап өтуге қызу дайындық үстінде.

Бұқаралық ақпарат құралдарының Қазақстанның тәуелсіз мемлекет ретінде қалыптасу жылдарындағы әлеуметтік-экономикалық салалардағы өркенді өзгерістердегі алатын орны мен атқарған қызметі айрықша. Сіздер, ел Президенті, Ұлт көшбасшысы Нұрсұлтан Әбішұлы Назарбаевтың жасампаз идеяларының төңірегіне қоғамды топтастыру, ұлтты ұйыстыруға зор үлес қосып келесіздер.

Байланыс және ақпарат қызметкерлері күні - газет пен журнал, телевизия мен радио, полиграфиялық сала қызметкерлеріне ортақ мереке. Бұл - тек журналистер үшін ғана емес, сонымен бірге кадр сыртындағы жандар мен газет-журнал беттерін қалыптайтын, хабарды эфирге дайындайтын мамандар үшін де маңызы зор күн.

Мерзімдік басылымдар мемлекеттің шынайы қолдаушысы. Оның ең негізгі әрі көне түрлерінің бірі - газет. Тұрғындар үшін көкейтесті және жедел ақпарат көзі болып табылатын төл басылым - 80 жылдық тарихы бар «Жұлдыз» - «Новая жизнь» газеті ауданымыздың жылнамасына айналды. Ұжымның шығармашылық ізденістері мен қажырлы еңбектерінің арқасында бүгінде аталмыш басылымның аудан тынысында алатын орны ерекше.

Құрметті ауданымыздың байланыс және ақпарат қызметкерлері мен сала ардагерлері!

Сіздерді төл мерекелеріңізбен құттықтай отырып, зор денсаулық, ашық аспан, таусылмас өмір қуатын тілейміз. Қаламдарыңыздан қасиет кетпей, шабыттарыңыз шыңдала берсін. Табысты да жемісті еңбектеріңіз ақталып, алдағы мақсаттарға жету жолындағы жаңа биіктер мен шыңдардан көріне беріңіздер!

Сіздерге еселі еңбектеріңіз үшін үлкен алғысымызды білдіреміз. Алдағы уақытта да қоғамымызды нығайтып, ауданымыздың өсіп-өркендеуіне сүбелі үлес қоса береді деген сенімдеміз.

А.С.Смаилов, Көкпекті ауданының әкімі

Т.М.Сарманов, Көкпекті аудандық маслихаттың хатшысы

Пікір: