Белгілі жаттықтырушы Бақыт Рахимов дайындайтын таэквандошылар Моңғолияның астанасы Ұлан-батыр қаласында өткен Азия құрлығы чемпионатынан жеңіспен оралды. Анатолий Бойков алтын медаль иеленсе, Рахат Байсақалов қола жүлде алды. Жеңімпаздарды аудан орталығы Көкпекті ауылындағы жан-күйерлері көкбайрақты желбіретіп автошерумен қарсы алды.

Анатолий Бойков туралы айтар болсақ, ол осы Көкпекті ауылындағы үлгілі жанұя Бойковтар отбасында дүниеге келген. Әке-шешесі ауданға мәлім кәсіпкерлер. 2011 жылы Көкпекті орта мектебінің бірінші сыныбына барған Толя жастайынан Бақыт Рахимовтың таэквон-до ITF секцисында даярланады.
2017 жылы Қазақстан Республикасының чемпионатында екі жүлде – алтын және күміс медальдарды иеленді. Үстіміздегі 2018 жылы Қазақстан Республикасының чемпионы болып алтын медалін жарқыратып бірінші пъедастальға шықты. Дәл осы жылы өткізілген халықаралық турнирде салмағы 60 қадақ, бойы 1 метр 85 сантиметр болатын Толағай елінің тегеурінді ұлы Анатолийдің қарқынына ешкімде шыдас бермеді. Ұпай санымен ғана қола жүлдеге ұйғарылды. Бұл Көкпекті орта мектебінің оқушысы, атақты жаттықтырушы Бақыт Рахимовтың тәрбиеленушісі Анатолий Бойковтың көптеген жеңістерінің бір парасы ғана. Азия чемпионының алда алар асуы көп, тек қана өзі айтқандай «Барлық жетістіктерім мен жеңістерімді сүйікті Отаным Қазақстанға арнаймын!» - деген тілегіне жетсе дейміз.
Киіз туырлықты қазақ-моң-ғолдың бәсекелі бәйгесінде бәсіресіне қола медаль бай-ланған жүлделі оғланымыз, жеңісті ұланымыз Аманкелді мен Нұргүл Байсақаловтардың үміт күткен ұлдары – Рахат Байсақалов болды. Рахат таэквандошыны да жаттықтыратын барған жерінен жүлдесіз келмейтін, Көкпектіге жылына неше алтын әкеп медаль жаңбырын төктіретін – Бахыт Ғазизұлы Рахимов. Бапкер Рахимовтың айтқан үддесінен шығып, сенімін ақтаған Рахат Байсақалов 2015 жылдың әлем кубогы чемпионатында қола жүлдені қағып түсірсе, 2018 жылы Қазақстан чемпионатында жүлдені жұлып әперді. Бойы 1 метр 65 сантиметр болсада, 60 қадақ салмағымен талай таэквандошыны тәубесіне келтірген Рахаттан көкпектілік жанкүйердің күтері көп.
Көкпектілік таэквандо спортын әлемге танытып жүрген Анатолий мен Рахат көкпектілік жанкүйерлерге әлі талай жеңісті күндер сыйлайды - деп үміттенеміз.

Қайрат БЕСБАЙЫС

Пікір: