Үлгілімалшы ауылдық округіне қарасты Мамай ауылында осында туып-өскен Ержан Елубаевты еске алуға арналған волейболдан ашық турнир болып өтті. Турнирге облыс көлемінде Абай, Тарбағатай және жергілікті Көкпекті ауданы спортшылары – барлығы 14 команда қатысты. 
Үлгілімалшы волейболы бүгінде мамайлық, қарағандыкөлдік спортшылармен толығып аудан, облыс көлемінде жүлделі орындарға ие болып жүр. Турнир кестесінің бірінші ойынын бастаған турнир иесінің Семей қаласынан келген сыныптас достары мен Тассай ауылының Тассай -1 командасы болды. Семейден келген елуді еңсерген жігіт ағалары Тассайдың жалынды жас-тары тегеуірініне шыдас бере алмай 2:0 есебімен жеңіліс тапты.

Бұдан әрі өрістеген волейбол ойыны алаңды қызыл майдан, ала доптың ұрысына айналдырып жіберді. Абай ауданының Қарауыл ауылынан келген спортшылар кез-келген алаңды бағындыратын, жанкүйерін жақсы ойынмен тәнті ететін хас шеберлер екенін көрсетті. Көкпекті ауданының Самар ауылынан келген спортшыларда көкпектілік волейбол спортының облыстағы кез келген командамен тіреске түсе алатынын білдіріп, мамайлық көрермендерге сауатты да қызықты ойын сәттерін сыйлады. Ежелден көрші бір көлдің жағасында, бір жазықтың бойында өскен Тассайлықтар мен Үлгілімашылықтар бір ененің баласындай тел өскен құрбы-құрдас емес пе, командалар ойыны турнирге лайық болды. Жеңіске деген ұлы дүбірде Аққала, Көкжайық, Көкпекті, Үлгілімалшылықтар және турнир қожайындары мамайлық өрендер волейболдың нағыз халықтық ойын екенін көрсетіп, ала допты ойындары қанғанша армансыз соқты. 
Турнир басталарда марқұмның туған туыстарына бірге оқыған достары сый-сияпат жасап, ауылда арнап ас берілетін де айтып өтті.

ҚАЙРАТ МӘЛІКАЖДАР

Пікір: