1 наурыз «Алғыс айту» күніне орай Ж. Шайжүнісов атындағы орта мектебінде «Жылы жүрек - жомарт қол» тақырыбында мерекелік іс-шара өтті. Бүгінгі таңда қоғам назарын жетім және ата-ананың қамқорлығынсыз қалған балаларға көңіл аудару мақсатында елімізде сан түрлі шаралар жүзеге асырылып жатқаны белгілі. Осындай жарқын істер Көкпекті ауданында жақсы жолға қойылған. Оған қайырымдылық шаралары барысында жомарттық танытатын азаматтардың көбейіп келе жатқаны куә. 

Мұндай дүбірлі шараны өткізудің мақсаты, мұқтаж жандарға қол ұшын беріп, қайырымдылық жасай білетін, жаны жомарт, болмысы мәрт, ірі істер мен баянды бастамалардың басы-қасынан табылатын азаматтарымызға құрмет көрсетіп, алғыс білдіру болды.

Ж.Шайжүнісов атындағы орта мектептің әлеуметтік педагогы Ғалия Өмірғалиева жыл сайын осындай игілікті істің бастамашысы болып жүр, оның айтуынша : 
-Мерекелік кешке мектепте өтетін қайырымдылық акциялардың барлығына белсене ат салысатын, әлеуметтік тұрмысы төмен отбасынан шыққан балаларға мектепке қажетті құрал-жабдық пен киім-кешек алып берген азаматтар және «Роботты техника» кабинетін ашу үшін көмек қолын созған жеке кәсіпкерлер шақырылды. Оларға 1 наурыз Алғыс айту мерекесі күні жүрекжарды алғысымызды білдіргіміз келді, - дейді. 
Бұл күні ата-аналар атынан Манарбек Ханұлының, кештің арнайы қонақтарының бірі Көкпекті ауданы Кірістер басқармасының басшысы Қуаныш Умаровтың мейірімділікке толы тілектері, тамаша, мән-мағынасы зор сөздері, жүрек жарды лебіздері айтылды. Сонымен қатар, шара барысында мектеп директоры Қажет Жүнісбекұлы қонақтарға алғыс білдіріп, жаны жомарт азаматтарға Алғыс хат табыстады. Кештің соңы мектеп оқушыларының концерттік бағдарламасымен ұласты. 
Қайырымдылық қанат жайып, сүйіспеншілік салтанат құрған елдің ғана болашағы баянды.Көңілі дархан даладай, кең пейілді қазақ – қашанда жетімін жылатпаған халық. Мәңгілік Елдің ұрпақтары тұғырдан таймай, тек биікте самғай берсін, жүрегі мейірімге толы қайырымды жандар қатары көбейе берсін дейміз.

КЛАРА ҚАЙЫПЖАНҚЫЗЫ

Пікір: