16 желтоқсан - Қазақстан Республикасының Тәуелсіздік күні. Бұл – теңдесі жоқ тарихи күн, Ұлттық мереке. Азаттық деген – асыл сөз. Тәуелсіздік деген – тәтті ұғым. Бұл кешегі бабалардан қалған жәдігер сөз. Тәуелсіздік - тәуекел еткеннің ғана бағына бұйыратын бақыт.
Еуразия жүрегінде, өркениеттердің ұштасқан орталығында талай ұлт пен ұлыстың құт мекеніне айналған ұлы далада азат елдің азаматы атанғаннан асқан бақыт жоқ.
Бүгінде сол құндылығымыз – ел Тәуелсіздігіне 25 жыл толып отыр. Қазақстан өз Тәуелсіздігін жариялағаннан кейін ел дамуында жаңа тарихи кезең басталды. Бейбітшілік пен келісім, саяси тұрақтылық пен экономикалық өрлеу жүйесі қалыптасты.
Қазақстан Республикасының Тұңғыш Пре-зиденті - Елбасы Нұрсұлтан Әбішұлы Назар-баевтың дана басшылығымен егемен еліміз әлем қауымдастығынан лайықты орын иеленді. Аз ғана уақыттың ішінде Қазақстанның әлеу-меттік-экономикалық әл-ауқаты, мәдени, рухани келбеті бұрын болып көрмеген биік деңгейге көтерілді.

Бұл тарихи табыстарға ұлт пен ұлыстың татулығы, демократияның берік негіздері мен барша қазақстандықтардың қажырлы еңбегінің нәтижесінде қол жетті. Елдің даму көшінде көкпектіліктердің де өзіндік орны бар. Аудан тұрғындарының ерен еңбектерінің нәтижесінде өңірде экономиканың барлық бағыттары қарқынды дамып келеді. Әр салада жаңашыл бастама, игі істер бар.
Тәуелсіздік – қашанда киелі құндылық. Біз еркіндігімізді әрқашан мақтан тұтып, қастерлей білуге тиістіміз. Бұл - біздің азаматтық парызымыз, адамдық борышымыз.
Барша көкпектіліктерді Қазақстан Республикасы Тәуелсіздігінің 25 жылдық мерейтойымен шын жүректен құттықтаймыз! Тәуелсіздігімізді тұғырлы ету жолындағы еңбектеріңізге табыс, отбасыларыңызға амандық, бақ-береке тілейміз!
Тәуелсіздігіміз берік, бірлігіміз бекем болсын!

Р.Сағандықов, Көкпекті ауданының әкімі
Т.Сарманов, аудандық мәслихат хатшысы

Пікір: