Өскемен қаласында Шығыс Қазақстан облысының  ХХ халықтық спорт ойындары аяқталды. Тәуелсіздіктің 25 жылдық мерейтойына арналған аталмыш спорт шарасына 16 спорт түрі бойынша облыстың 19 құрамасы қатасып, аудандар мен қалалар өзара сынға түсті. Өңірдің мықтылары бас қосқан дүбірлі додаға көкпектілік спортшылар да қатысып, аудан намысын қорғады.

Жиырма мәрте өткізіліп отырған халықтық спорт ойындарының бағдарламасы биыл жылдағыдан біршама өзгеріске ұшыраған. Негізгі спорт түрлеріне қосымша облысты мекендейтін 15 ұлттың ойыны қосылды.  Ұлттық ойындардағы ұпайлар киіз үйлер байқауының ұпайы есептелді. Бәйгетөбе аумағындағы этноауылда балалардың спорттық ойындарына арналған алаңдар көпшілік көзайымы болғаны анық. Көкпекті ауданы тіккен алты қанат ақ орда маңы көпшіліктің ең көп аялдап, естелік суретке түсіп, Қазақ хандығының құрылу тарихын суреттеген көрініске сүйсінер орнына айналып шыға келді. Бес қаруын асынған батырлар мен алыстан көз шалатын салтанатымен ерекшеленген Керей хан мен Жәнібек хан тұлғалары, сан ұлттың достығын жырлаған көрініс, ақ орда ішіндегі мазмұнды да тартымды көрме абыройымызды асырып, мерейімізді үстем етті.

Арнайы комиссия мүшелері де қырағылық танытып бақты. Көкпектілік өнерпаздар мен ұйымдастыру алқасының қажырлы еңбегі тиісті бағасын да алды. Киіз үйлер байқауының қорытындысы бойынша тақырыпты кеңінен ашып, үздік шыққаны үшін Көкпекті ауданы қаржылай сыйлық және сертификат олжалады. Лапта, қалашық, сырықпен жүру, кураш және тағы да басқа ұлттық спорт түрлеріне қатысқан жерлестеріміз де жерге қаратпады. Әр бір спортшының жүзінен ақ аудан намысын қорғау өзі үшін мәртебе екені жалындап тұр.

Орталық стадионда Шығыс Қазақстан облысы әкімінің жүлдесіне өткізілген ХХ халықтық спорт ойындарының ашылу салтанаты болды. Сөз алған облыс басшысы Даниал Ахметов өңірде тұрғындарды дене шынықтыруымен айналысуға шақыру бойынша ауқымды жұмыс атқарылып жатқанын айтты. - Дәстүрлі халықтық спорт ойындары – бүкіл аймақ жұртшылығы асыға күтетін спорт мерекесі. Дені сау ұлт – мемлекет тірегі. Елбасы Нұрсұлтан Назарбаев жүргізіп отырған саясаттың арқасында, халқымыздың денсаулығы мықты, ойы сергек болуына, бұқаралық спорттың дамуына барлық жағдайлар жасалды, - деді Даниал Кенжетайұлы.

Волейболдан Қазақстан ұлттық құрама командасының мүшелері, «Алтай» волейбол клубының ойыншылары Дамир Әкімов пен Инна Матвеева ойын алауын жақты. Аудан әкімінің орынбасары Клара Смаилова мен білім беру және дене шынықтыру бөлімінің басшысы Шолпан Мұстафинова бастаған көкпектіліктер шеруі ерекше киім үлгісімен көзге түсті. Шеруге қатысушылар ашылу салтанатына арналған концертті тамашалап, мерекелік от шашу куәгері болды.

Спорттық жетістіктер тұрғысында биылғы халықтық ойындар біздің аудан құрамасы үшін сәтті болды деп айту қиын. Аудан спортшыларының мүмкіндіктері мен бұрынғы жетістіктерін ескерер болсақ, биылғы көрсеткіштер болашақта бұл бағыттағы жұмысқа көзқарасты өзгертіп, тың серпін керектігін айқындайды деген сенімдеміз.

Бәрінен де біздің волейболшы жігіттер ерледі! Мұсабек Нұгұспанов жаттықтыратын волейболшыларымыз облыста үздік екендерін мойындатты. Топтан қиналмай шыққан жігіттер ақтық сында Тарбағатай және Күршім ауданы құрамаларын айқын басымдықпен жеңіп, Халықтық ойындардағы біздің ауданның жалғыз алтынын қанжығаға байлады. Құрама капитаны Әділет Такеновтың еңбегін ерекше бағалауға тұрады. Ойынға дайындық, жаттықтыруларды ұйымдастыру, құрама жігіттерін қажет кезінде қайраттандырып, жігерін жану, әрбір ойыншының тілін табу сынды мәселеде Әдлеттің капитандық қасиеттері маңызды рөл атқарды. Әсет Әбетаевтың ойынды жүргізу мәнері, Арман Зейнолдиновтың либеролық тәсілдері, Тілек Маткаримовтың қосалқы құрамнан шығып тың серпін қосуы жанды жадыратып, көз сүйсіндіреді. Ал енді Иван Яловойдың ойын өрнегі жеке бір әңгіме. Құраманың үздік шабуылшысы тартысты сәттерде ойын нәтижесін бір ғана ұтымды соққысымен шешіп кету арқылы қарсыластарды талай сан соқтырды. Сондай-ақ, облыста Көкпекті ауданын бірінші орынға шығарған құрама ойыншылары Таңат Абдуашев, Карим Молдабаев, Иван Крюков, Мади Жиенбаев, Денис Кривко, Азат Қожахметов және Ришат Бектаевтың есімдерін біз зор мақтанышпен атаймыз.

Көкпаршы жігіттер де аудан намысын лайықты қорғады. Қанат Биқатов жаттықтыратын көкпаршылар құрамасы ақтық сынға дейін жетті. Ежелден тартысып келе жатқан Тарбағатай жігіттеріне финалда есе жіберген көкпаршыларымыз жарыстың екінші орынын місе тұтты. Ақтық сында есесі кеткен көкпаршылар алдағы уақытта дайындықты үдетіп, тұлпарларды баптап, білекті бекемдеп алсақ әлі талай додада  аудан қоржынын алтынмен аптаймыз дейді. Жүректі де білекті жігіттердің сөзіне күмән жоқ ешбір.

Дүбірлі додада аудан атынан бәйгеге түскен тұлпарымыз да топты жарды. 15 шақырымдық бәйгеде бабы мен бағы келіскен «Шағала» атты сәйгілік мәре сызығын екінші болып кесті. Бөркін аспанға атқан көкпектіліктердің мәртебесін асқақтатқан «Шағаланың» иесі Жұмабек Күшікпаев. Әйгелі атбегі Рустам Шайырғазин жаратқан жүйрігіміз осылайша аудан құрамасына тағы бір күміс еншіледі.

Дәурен Данабек жаттықтыратын қазақ күресінің балуандары да боз кілемде барын салып белдесті. Нәтижесінде 60 кг. салмақта күрескен Дидар Тукушев аудан қоржынын қола жүлдемен толықтырды. Сонынмен бірге, волейболшы қыздар 5 орын, ұзындыққа секіруден Юля Герлих пен Елдос Анатпаев 4 орын еншіледі.

Жалпы командалық есепте аудан құрамасы жеңіп алған медальдар саны бойынша 7 орынға жайғасты. Бұл аудандар арасындағы 14 құраманың бел ортасы. Жаман көрсеткіш емес, әрине. Дегенмен, кейбір олқылықтар мен ұйымдастастыру жұмыстарындағы кемшіліктердің орнын жойсақ бағындырар белестер де биік болмақ. Үздік үштікке ену біз үшін қол жетпес арман емес, біраз жыл бұрын жетіп жүрген мәреміз.

Дархан БЕРДІБЕК

Пікір: