Ринат Араратұлы Қажиақперов, аудандық маслихаттың депутаты: -9 сәуір күні Мемлекет басшысы Қасым-Жомарт Тоқаевтың елімізге және әрқайсымызға қатысты аса маңызды Үндеу жарияланғанын білеміз. 
Еліміздің Конституциясына сәйкес Қазақстан Республикасы Президентінің кезектен тыс сайлауын 2019 жылдың 9 маусымында өткізу туралы шешім қабылданды. Кезектен тыс сайлау туралы шешім қабылдау – өте маңызды әрі қажетті қадам.Мемлекет басшысының айтуынша, еліміз қазіргі таңда тарихи кезеңді бастан өткеруде. 
Қазақстан – демократиялық мемлекет. Президент халықтың таңдауымен сайланады. Қасым-Жомарт Кемелұлы алдағы өтетін сайлаудың таза, ашық әрі әділ өтуіне зор сенім білдіріп отыр. 

Қымбатты Отандастар!

Бүгін елімізге және әрқайсымызға қатысты аса маңызды Үндеу жариялап отырмын.

 Еліміздің Конституциясына сәйкес Қазақстан Республикасы Президентінің кезектен тыс сайлауын 2019 жылдың 9 маусымында өткізу туралы шешім қабылдадым.

Мен бұл жауапты шешім бойынша Елбасымыз Нұрсұлтан Әбішұлы Назарбаевпен ақылдастым.

Парламенттің қос палата спикерімен, Премьер-Министрмен кеңестім.

Конституциялық Кеңестің келісіміне жүгіндім.

Парламенттегі партия жетекшілерімен кездестім.

Кезектен тыс сайлау туралы шешім қабылдау – өте маңызды әрі қажетті қадам.

Біз Елбасымыздың арқасында тәуелсіз, қуатты мемлекет құрдық. Қазақстан халықаралық жүйеде өзіне лайықты орнын алды. Бізді ықпалды және белді мемлекет ретінде бүкіл әлем мойындайды.  

Қазіргі таңда тарихи кезеңді бастан өткеріп отырмыз.

Жоғары билік заңды және бейбіт жолмен ауысты. Бүкіл әлем қоғамдастығы осы оқиғаны түсіністікпен және құрметпен қабылдады.  

Мемлекет басшысы ретінде мен өзімнің міндетімді және жауапкершілігімді терeң сезінемін.