Аудандық әкімдіктің мәжіліс залында аудан әкімі Әділет Қожанбаевтың төрағалық етуімен шағын аппараттық кеңес өтті. Отырысқа аудан әкімінің орынбасарлары, ауылдық округ әкімдері, дербес бөлім басшылары, мекеме және ұйым басшылары, салалық қызмет өкілдері қатысты. 

Жиналыс барысында жаңа тағайындалған аудан әкімі Әділет Қожанбаев барлық сала басшыларымен жеке танысып, алдағы уақытта атқарылатын жұмыс бағыты мен жоспарларды талқылады.
- Қойнауына құт қонған, әр тасына тарих бейнеленген Көкпекті ауданына басшылық ету мен үшін зор жауапкершілік. Киелі Көкпекті топырағы мен үшін бөтен емес - кіндік қаным тамған қасиетті туған жер, алтын бесігім. Алдағы уақытта сіздермен етене жақын танысып, көнегөз қарияларымыз, алтын құрсақ аналарымызбен ақылдасып, бірге жұмыс істейміз деп сенемін. Бірінші кезекте халықтың әл-ауқаты жақсарғаны біз үшін аса маңызды. Алда үлкен міндеттер тұр. Баршаңызды туған жерімізді көркейту жолында бірлесіп жұмыс жасауға шақырамын, - деді Әділет Нұрсағатұлы.
Аудан басшысы ең өзекті мәселелердің бірі ретінде тұрғын үй коммуналды шаруашылығы және құрылыс салаларының жұмысын жүйелеу екенін атап өтті.

Дархан БЕРДІБЕК 

Қазақстан Республикасы Президенті Әкімшілігінің және  Көкпекті аудандық мәслихатының келісімімен, облыс әкімінің өкімімен Қожанбаев Әділет Нұрсағатұлы Көкпекті ауданының әкімі болып тағайындалды. 5 тамыз күні Абай облысының әкімі Нұрлан Ұранхаев Көкпекті ауданына жұмыс сапарымен келіп, аудан жұртшылығына жаңа әкімді таныстырды.

Әділет Қожанбаев 1980 жылы 1 қаңтарда дүниеге келген. 1997-2000 жылдары Семей қаласындағы «Қазтұтынуодағы Аң терісі-мех колледжін» «Бухгалтерлік есеп және аудит» мамандығы бойынша оқып бітірген. Кейін Қазақ коммерциялық Қаржы академиясында оқуын жалғастырып, 2005 жылы Алматыдағы «Тұран» университетін сол мамандық бойынша тәмамдады. Әділет Қожанбаев 2012 жылы «Тұран» университетінде заңгерлік білім алды. 2019-2021 жылдар аралығында Ресей Федерациясының Президенті жанындағы Ресей халық шаруашылығы және Мемлекеттік қызмет академиясында оқыды. Онда ол Мaster of Business Administration (MBA) дәрежесін алды.