Өлкеміздің басты байлықтарының біріне саналатын балықтың уылдырық шашатын уақытына орай облыстың су қоймалары мен өзен-көлдерінде 16 сәуір - 30 мамыр аралығында балық аулауға қатаң тыйым салынған.
Осы тыйым салу уақытында Көкпекті инспекция бөлімінің мемлекеттік инспекторлары уақытпен санаспай, ауа-райының қолайсыздығына қарамай, балықтың уылдырық шашуына барлық жағдай жасап, күндіз-түні еңбек етті. Арнайы штаб құрылып, кезекшілік қойылды. Үгіт-насихат жұмыстары жүргізіліп, Көкпекті ауданының прокуратурасымен, ІІБ бірлесіп, жұмыс жоспары бекітіліп, рейдтер өткізілді.

Тыйым айлығында 32 шұғыл рейд өткізіліп, құқық бұзушыларға 13 дана хаттама толтырылып, 3 азаматқа келтірген зияны үшін 14748,5 теңге айыппұл салынды.
Табиғат байлығын тонаушылардан 10 ау, 1436 кг. балық, 2 қайық тәркіленді. Тыйым айлығы кезінде заңсыз балық тасымалдаумен және аулаумен айналысқандарды атап кетейік: Үлгілімалшы аулының тұрғындары: Марат Рахымбаев, Архат Калелов, Бақытбек Тұрғанбаев; Тассай ауылының тұрғындары: Қуат Қуанов, Жандос Тұрсынов, Ержан Назарбеков, Владимир Захаров; Зырян қаласының тұрыны: Сергей Карташов.
Осы айлық кезінде балық инспекция бөлімінің инспекторлары ғана емес, зиялы азаматтар да атсалысса деген тілегіміз бар. Тоқ етерін айтқанда, тыйым айлығының тиянақты өтуіне жеке мән беріп, табиғат байлығын қорғап қалайық.

Қ. Сейтов,

Көкпекті инспекция
бөлімінің басшысы

Пікір: