Материалдар

Темірболат құрыштан құйылған сом білекті, түкті жүректі аталарымыздың даңқ биігін аласартпаған еркін күрестің ер оғланы - Данияр Қайсанов Үнді мұхитының ортасындағы Джакартада өтіп жатқан Азиададан елге күміс жүлде әкелді.

Палуанды туған жері - Көкпекті ауданының тұрғындары қуанышпен қарсы алды. Көкпекті – Самар тас жолының Үлкенбөкен ауылына кіреберісінде аудан әкімінің орынбасарлары - Дәурен Қойгелдин мен Марат Теміржанов, ауданымыздағы белгілі спорт демеушісі, «Елім-ай Көкпекті» агрокешенінің басшысы Болат Мигражұлы Бекбердинов, атақты палуан Алтай Танабаевтар бастатқан аудан жұртшылығы өкілдері автошерумен, қошеметті эскортпен аудан орталығындағы митингіге бастап келді.

Азиаданың жүлдегерін қарсы алу митингісінде сөйлеген сөзінде аудан әкімі Асхат Смаилов ақжарма тілегін, ағалық алғысын Даниярдың ата-анасына, жаттықтырушыларына арнай келе: «Бүгінгі Даниярдың жеңісі талай жасөспірімнің жүрегіне ерлік отын жақты, көңіліне жеңіске деген зор сенім ұялатты, көкейіне ұлы арман қондырды. Спорт ұрпағымызды жеңіске жетелейді, Көкпекті елінде Олимпиада жеңімпазы шығар күн алыс емес. Оған біздің жастардың әлеуеті жететіндігіне мен сенемін»- деді. Жиынға Данияр Қайсановтың ата-анасы Әлібек пен Нұргүл Қайсановтар, Еркін күрестен Қазақстан Республикасы Ұлттық құрамасының бас жаттықтырушысы Әсет Хамитұлы Серікбаев, Қазақстан Республикасына еңбегі сіңген жаттықтырушы, еркін күрестен спорт шебері Алтай Еркінұлы Танабаев, Қазақстан Рес-публикасына еңбегі сіңген жаттықтырушы Марат Миғражұлы Бекбердинов қатысты. Ауданымыздағы дүниежүзілік аренаға шығып жүрген, тау тұлғалы тренерлер – Бақыт Рахимов, Бекболат Рахимов пен жас тәлімгер Өскен Төлеубаевтар да салтанатты жиынның құрметті қонағы болды. Сонымен қатар аудандық ішкі саясат бөлімі басшысы Бек Нұғыбаев, мәдениет және тілдерді дамыту бөлімінің басшысы Әлібек Саржанов, аудандық маслихат депутаты Дархан Бердібек және ауыл ақсақалдары мен жастар ұйымдары өкілдері жиылды. Ең бастысы аудан орталығындағы әлемдік, республикалық, облыстық, аудандық бәсекелерде жүлде алып жүрген жеңімпаз спортшы балалар – ауданның «Алтын жастары» шеп құрып, сап түзеді.
Дәулет Тұрлыханов атындағы спорт кешенінің кілемінде жас палуандар таэквандодан, еркін күрестен көрнекті жаттығуларын көрсетсе, Азиаданың күміс жүлдегері Данияр Қайсанов «шеберлік сыныбын» өткізді. Көкпектілік еркін күреспен айналысушы Ерқанат Нұрпейісовке спорт шеберлігіне кандидат белгісін табыстап, «диірмен», «жанай өтіп, арқадан алу» секілді жаттығуларды көрсетті. Жасөспірімдер палуанның қолтаңбасын алып, естелік фотосуретке түсті.
Аудан әкімі палуанның жаттықтырушысына, ата-анасына сый-сияпат көрсетсе, ауылымыздағы әйгілі меценат, ірі кәсіпкер Болат Мигражұлы Бекбердинов жүлдегерге ата жолымен шапан жауып, ат мінгізді. Қашанда жақсылыққа жаны құмар, әманда жастардың қолдаушысы Болат Мигражұлы өз шаңырағында ақ дастарханын жайғызып, еркін күрестен 2018 жылғы жазғы Азиада жүлдегерін жаттықтырушылармен, ата-анасымен қонақ етті.
Бәрін айтта, бірін айт, Индонезия мемлекетінде өткен 2018 жылғы VI-шы жазғы Азиада ойындары аяқталды. Біздің отандас спортшыларымыз ойын нәтижелері бойынша жалпы есепте тоғызыншы орынға жайғасты. Айта кетсек, бұрын соңды Қазақстан әрдайым Азия мемлекеттерінің үздік бестігіне ілініп жүрген болатын. Алайда биылғы Азиада-2018 ойындары қоржынымызға түскен 15 алтын мен 17 күміс медальдарды місе тұттық. Тек қола жүлде бойынша отандастарымыз өз рекордын 44 медальмен орната алды. Медальдік есептің үштігіне Қытай, Жапония және Корея мемлекеттері кірді. Төртінші орынға ойындар өтіп жатқан Индонезия елі орналасса, көршілес Өзбекстан спортшылары алғашқы бестікті аяқтады.

Қайрат БЕСБАЙЫС

Пікір: