9 Мамыр-Жеңіс Күні. Бұл – Отан қорғаудағы өшпес ерлік пен өлшеусіз даңқтың, халқымыздың шексіз қаһармандығы мен мұқалмас қажыр-қайратының ең айтулы мерекесі. Ұлы Жеңіс оңайлықпен келген жоқ.
Төрт жылға жуық, 1418 күн, Ұлы Отан соғысы болды. Бұл қайғы-қасірет, ауыр еңбек жылдары. Майдангерлердің иығына аса ауыр жүк түсіп, Отаны, елі үшін от болып жанды, оқ болып атылды. Қаншама боздақтар ұрыс даласынан қайтпай қалды Сонымен қатар бұл ерлік, Отанға деген шексіз сүйіспеншілік жылдары болды. Біз ардагерлерге олардың ерліктері үшін алғысымызды білдіреміз. Жыл сайын осы күні еліміздің шағын ауылдары мен үлкен қалаларында Даңқ мемориалының жанында майдангерлер, тыл еңбеккерлері мен қаза тапқан жауынгерлерге құрмет көрсету үшін салтанатты шаралар өтеді.
9 мамыр күні Самар ауылындағы Даңқ мемориалына адамдар мерекелік көңіл-күймен жиналған. Бұл жерде жиырмасыншы ғасырдың ең қанды және қатыгез соғыстағы жеңістің қандай жолмен келгенін, осы қасиетті күнді еске алу үшін барлық адамдар жиналды. Біз бейбіт аспан астында өмір сүріп, осы жарқын және қымбат мерекені 74-рет қарсы алып отырған Ұлы Жеңіс күнін жадымызда мәңгі сақтауымыз керек.

«Сәуір болмай тәуір болмас» деген ата-бабаларымыз, жер аяғы кеңіп, көктемгі шаруаның қызу басталар шағында ағаш отырғызып, айналаны абаттандыруға көңіл бөлген.
Ағымдағы жылдың 17 сәуір күні Сарыбел ауылдық округінде өткен сенбілікте жергілікті мекеме, мектеп ұжымы мен жоғары сынып оқушылары тазалық жұмыстарына бел шеше кірісті. «Жас өркен» көгалдандыру жоспар бойынша «Қайыңды» орман шаруашылығынан барлығы 85 түп қарағай, 70 түп қайыңды ағаш өсіру питомниктен әкелінген өскіндерді отырғызу жұмыстары жүргізілді.

Тассай елді мекеніндегі көктемгі қар суынан топырағы езіліп, ойдым-ойдым ойылып томарға айналған орталық көшедегі күре жолды шаруа қожалықтарының бес бірдей қуатты тракторы мен қайратты қыр жігіттері жұмыла кірісіп кешке дейін тас жолды тақтайдай етіп тегістеп тастаққа айналдырды. Шайтан арбамен жарыса шапқыласқан көк өрімдер де қуанып, көктеммен бірге жадыраған жұрттың да еңсесі көтеріліп сала берді.

Күн мен түннің теңеліп, көктен Тәңірдің нұры тамған, көпшіліктің көптен күткен қасиетті күні ғой бұл әз-Наурыз! Ұлыстың ұлы күнін дүркіретіп тойлауға тыңғылықты дайындалған Тассай жастары мерекенің көркін қыздырды. М.Әуезов мектебінің 2004 жылғы түлектері мектеп бітіргендеріне 15 жыл толуына орай ұлыс мерекеге демеушілік жасап, мерекеге мектеп қабырғасында спорттан дәріс берген тәлімгер-ұстаздарын шақырып құрмет білдіріп, волейболдан үлкен командааралық жүлделі-жарыс өткізді. Сайысқа қатысқан он команда ішінен суырылып шыққан спортшылар лайықты марапатқа және бағалы сыйлықтарға ие болды.
Жас буын үшін бұл да бір өнеге тұтар іс. Келер жылы көктемде 2005 жылдың түлектері осынау үрдісті жалғастырмақ ниетте. Көңілі көлдей ағайынның қуанышында шек жоқ. Қытымыр қыстан төрт көзі түгел, аман шыққан ауыл халқы бір-біріне ұмсына қол созып, қауқылдай құшақтасып: «Ұлыс оң болсын! Ақ мол болсын!» десіп қуаныштарын жасыра алмай жадырай күлісті. Кимешек киген әжелер мен шапан жамылған ақсақалдар, ақ жаулығын иықтан түсіре, қазақи камзолын киген жас келіншектер, сері жігіттер мен қылықты қыздар бәрі-бәрі наурыздың көркін кіргізіп, дөңгелек дүниедегі дербес ел қазақтың қасиетін арттырып тұр.
Ауыл шетінен орталыққа қарай шұбырған қазақтың кәдімгі тең байсалды көші. Қоңыраулы нарға тең артқан түйелі көшті көргенде «Қыз Жібек» көркем фильмін тамашалап отырған сияқты керемет әсер алдық» дейді театрландырылған көріністі тамашалаушылар.