Аудан әкімі Раджан Сейтқанов «Nur Otan» партиясы аудандық филиалының ғимаратында қоғамдық қабылдау өткізді. Санитарлық талаптарды сақтай отырып, аудан тұрғындарының жеке мәселелері бо-йынша мұң-мұқтажы мен өтініш-тілектерін тыңдады. Партия ғимаратындағы қоғамдық қабылдауға аудан әкімінің орынбасарлары, аппарат басшысы, дербес бөлім басшылары және тиісті ауылдық округ әкімдері қатысып отырды.

Аудан басшысының қабылдауына алдын ала жазылу ретімен барлығы 7 тұрғын келіп, өздерін толғандырған мәселелерін жеткізді. Қоғамдық қабылдауға келгендердің дені жер телімін алу мәселесін алға тартса, бірқатар тұрғындар жұмысқа орналастыру, жеке кәсібін жүргізуге қолдау жасау, Семей-Көкпекті бағытындағы қоғамдық көлік қатынасын реттеу сынды сұрақтармен жүгінді.

Ажа ауылына Қытай Халық Республикасынан көшіп келген қандасымыз Әсей Самат аудан басшысына азаматтық алу мәселесі бойынша құжаттарын рәсімдеуде көмек беруін сұрады. Атажұртқа қоныс аударған қандасымыздың сұрағы бойынша аудандық ішкі істер бөлімінің көші-қон жөніндегі мамандарына нақты тапсырма жүктелді. Ауылдық округ әкімі Қайрат Алғазинов пен жұмыспен қамту және әлеуметтік бағдарламалар бөлімінің басшысы Нұрбек Сүлейменовқа барлық әлеуметтік қолдау шараларын қарастыру тапсырылды.
Орталықтағы сауда дүңгіршектерінің иелері Амина Ескеалмасова мен Бақыт Гафурова аудан басшысына жер телімін заңдастарып беру туралы өтініштерін білдірді. Ұзақ жылдар сауда дүңгіршегінде кәсібін жүргізіп, отбасының табыс көзіне айналдырған еңбекқор жандарды мазалаған мәселе бойынша арнайы жұмыс тобын құрып, түбегейлі шешіп беру туралы тапсырма берілді.
Семей қаласымен аралықтағы жолаушылар тасымалын реттеу үшін облыстық басқармаға қатынас хат жолданады. Зайсан ауданына қатынайтын автобусты арнайы бір орынға тоқтатып, белгіленген жерден нақты бір уақыт аралығында Көкпекті тұрғындарын отырғызу мүмкіндігі қарастыралатын болды.
Қоғамдық қабылдауға келген әрбір тұрғынның өтініші мен ұсынысы тіркеуге алынып, орындалу барысы қатаң бақыланатын болады.

Пікір: