Ағымдағы жылдың 23 қараша күні, Тәуелсіздіктің мерейтойы аясындағы 25 жұлдызды күн Көкпекті ауылында өткен «НұрОтан» партиясының аудандық филиалының қолдауымен, мәдениет және тілдерді дамыту бөлімінің ұйымдастыруымен «Тіл – тұнық кәусәр» атты интеллектуалдық сайысымен жалғасын тапты.

 Тәуелсіздік тізгіні қолымызға тиіп, егеменді ел болған алғашқы күндерден бастап-ақ елімізде тіл саясаты Мемлекет басшысы Н. Назарбаевтың тікелей басшылығымен салиқалы да, сындарлы түрде жүзеге асырылуда. Елбасы жыл сайынғы Қазақстан халқына арнайтын дәстүрлі жолдауларында да тіл саясатына, оның ішінде қоғамдағы мемлекеттік тілдің мәртебесін көтеру мәселесіне тоқталмай өткен емес. Білім мен ғылымның, экономиканың, бизнестің, саясаттың, жалпы бәсекелестіктің қарыштап дамып отырған бүгінгідей жаһандану кезеңінде Елбасы көрегендік танытып, алдымызға үш тілді білу қажеттігін қойып отыр. Әсіресе, өскелең ұрпақтың, жастар алдында бірнеше тіл білу міндеті тұр. Мемлекет басшысы “Жаңа әлемдегі жаңа Қазақстан” атты Қазақстан халқына Жолдауында: “Қазақстан халқы бүкіл әлемде үш тілді пайдаланатын жоғары білімді ел ретінде танылуға тиіс. Бұлар: қазақ тілі – мемлекеттік тіл, орыс тілі — ұлтаралық қатынас тілі және ағылшын тілі —жаһандық экономикаға ойдағыдай кірігу тілі”, — деген болатын.

Сол себепті де, шараның мақсаты үш тілді – қазақ тілі, орыс тілі, ағылшын тілдерін жетік меңгерген жастарды анықтау, тіл саясатын жүзеге асыру, жастардың тіл меңгеруге деген ынтасын арттыру, заманға сай жас мамандардың қалыптасуына үлес қосуды дамыту болды.

Ойын негізі. «Таныстыру», «Палиглот», «Тапқырлар», «Аудармашы» кезеңдерінен тұрды. Шараға Самар ауылдық округінен Гүлназ Дәулетхан, Айжан Бекмұрат, Теректі ауылдық округінен Құралай Қонақаева қатысты.

Қатысушыларды сараптайтын қазылар алқасының құрамында «НұрОтан» партиясының Көкпекті аудандық филиалының төрайымы Г.Ақшабаева, Көкпекті орта мектебінің ағылшын пәні мұғалімі А.Тоянкенова, Ж.Шайжүнісов атындағы орта мектептің қазақ тілі пәнінің мұғалімі Анар Сағынаева болды. Сайыстың қорытындысы бойынша 1 орын теректілік жас маман Құралай Қонақаева, 2 орын Гүлназ Дәулетхан алса, 3 орын Айжан Бекмұрат қанжығалады.

Жеңімпаздарға сонымен қатар, алғыс хатпен, сыйлықтар табыс етілді

Клара ҚАЙЫПЖАНҚЫЗЫ

Пікір: