Жаттықтырушы Руслан Жүнісовтың шәкірттері Қарағанды қаласында өткен «Алтын бала» әлем чемпионатының 2 күміс және 1 қола жүлдесін еншіледі. NOMAD MMA аралас жекпе-жек өнері бойынша өткен жарыста Көкпекті орта мектебінің оқушылары Ансар Болатов қола медаль, Динияр Галиев пен Ернұр Қайырлы күміс медаль жеңіп алды.
«Алтын бала» чемпионатын Nomad MMA Бүкіләлемдік федерациясы және Қазақстанның жекпе-жек өнері Республикалық Одағы ұйымдастырған. Турнирде 17 елден келген 10-17 жас аралығындағы 530 спортшы бала бақ сынас-ты. Елімізде Nomad аралас жекпе жек өнерінің ең алғаш таралған аумағы болып саналатын Қарағандыда өткен жарысқа біздің ауданнан барлығы 23 бала қатысты.

Аралас жекпе жек өнерімен төртінші айналысып жүрген 9 жасар Динияр Галиев үшін бұл әлем чемпионаты алғашқы үлкен жарысы. Шынашақтай ғана батыл жеткіншек «Алтын бала» турнирінде 4 жекпе жек өткізіп, оның үшеуін айқын басымдықпен аяқтаған. Ақтық сында ғана тәжірибесі басымдау қарсыласына ұпай санымен жол беріп, күміс жүлдені місе тұтты. Бірақ, жанары жалын атып тұрған жүректі жастың оған қаймыққан түрі жоқ. «Геннадий Головкин сияқты әлемге танымал спортшы болам», - дейді Динияр. Талабыңа нұр жаусын!
Мектеп әкімшілігі жеңімпаз өрендерді салтанатты жағдайда құттықтап, демеушілерге алғысын білдірді. – Білікті жаттықтырушы Руслан Жүнісовтың еңбегімен аралас жекпе-жек өнері ауданда соңғы уақытта жылдам қарқын алып келеді. Түрлі жарыстардан табыс-ты оралып жүрген жеңімпаздарға қарап, мектеп оқушыларының спортқа деген қызығушылығы күн сайын артуда. Жастарымыздың алдағы уақытта әлемдік додаларда ел намысын қорғап, көк туымызды желбіретініне мен сенімдімін, - дейді мектеп директоры Аслан Танысбаев.
Әлем чемпионатында табысты өнер көрсеткен жас спортшыларға қаржылай қолдау танытқан Айдын Ибрагимов, Александр Бойков, Виктор Виничук сынды жергілікті кәсіпкер азаматтар.

Дархан БЕРДІБЕК

Пікір: